काठमाडौं । प्रतिनिधि सभा सदस्य रवि लामिछानेले प्रधानमन्त्रीले आफूलाई प्रधानमन्त्री बनाउने भारतीय नागरिक सरदार प्रितम सिंह दिल्ली धाएको भनि दिनुभएको अभिव्यक्ति घोर आपत्तिजनक रहेको बताउनुभएको छ ।
सोमबार प्रतिनिधि सभा बैठकमा बोल्दै लामिछानेले यस विषयमा प्रधानमन्त्रीले संसदमा स्पष्टीकरण दिनुपर्ने बताउनुभयो । ‘प्रधानमन्त्रीले यस बारेमा खुलेर बताउनु पर्ने छ, सदनलाई बताउनु पर्ने छ’, उहाँले भन्नुभयो ।
आफूहरूले हस्ताक्षर गरेर प्रधानमन्त्री बनाएको भन्ने लागेको भए पनि प्रधानमन्त्रीको अभिव्यक्तिले उहाँलाई भारतले प्रधानमन्त्री बनाएको भन्ने बुझिएको लामिछानेले बताउनुभयो । सार्वभौम देशको अस्तित्वलाई प्रश्न खडा गर्ने किसिमले जुन अभिव्यक्ति दिनुभयो, त्यो आपत्तिजनक छ’, उहाँले भन्नुभयो ।
प्रधानमन्त्री कहिले ३५ हजार होइन ७ हजार मात्र लडाकु थियौँ भन्ने, कहिले द्वन्द्वमा मारिएका १७ हजार होइन ५ हजारका मात्रै जिम्मा लिने भन्ने, कहिले कम्फर्टेवल भन्ने र कहिले प्रधानमन्त्री नै अरूले नै बनाएको अभिव्यक्ति दिने गरेको भन्दै त्यस विषयमा सोच्न र सच्चिन लामिछानेले आग्रह गर्नुभयो ।
लामिछानेले मिटरब्याजी विरुद्धको कानुन ल्याउने कुरामा राष्ट्रिय स्वतन्त्र पार्टी सधैँ प्रतिबद्ध रहेको बताउँदै सत्तारुढ दलकै कारण सो ऐन रोकिएको बताउनुभयो । सदन अवरुद्ध हुँदै छ भन्ने थाहा पाउँदा पाउँदै सरकारले अन्तिम समयमा मात्र सो विधेयक ल्याएको भन्दै उहाँले सरकारको कार्यशैली प्रति शंका व्यक्त गर्नुभयो ।
संसद् तीन दलका नेताहरूको लाडाईँको बन्धक बन्न नहुने समेत उहाँले बताउनुभयो । जनताको मुद्दामा संसद् रोकिन सक्ने भए पनि संसद्को भूमिकालाई केही नेताहरूको बन्धक नबनाउन उहाँले आग्रह गर्नुभयो ।
