काठमाडौं । प्रतिनिधि सभा सदस्य राजेन्द्रप्रसाद लिङ्देनले प्रधानमन्त्री पुष्पकमल दाहाल प्रचण्डको राजीनामा माग गर्नुभएको छ ।
सोमबार प्रतिनिधि सभा बैठकमा बोल्दै लिङ्देनले आफूलाई भारतले प्रधानमन्त्री बनाएको भन्ने अभिव्यक्ति दिने प्रधानमन्त्रीलाई सो पदमा रहने नैतिक अधिकार नरहेको बताउनुभयो । ‘प्रधानमन्त्रीमा नैतिकता भन्ने चिज जीवित छ भने राजीनामा दिनुपर्छ’, उहाँले भन्नुभयो ।
प्रधानमन्त्रीले कुनै अमुक दलहरूको गठबन्धन सरकार बन्दा भारतको लागि कम्फर्टेबल हुने अभिव्यक्ति दिएको उहाँले स्मरण गराउनुभयो । त्यतिखेर उहाँ सरकारमा नभएकोले राजनीतिक टिप्पणी गर्ने बाहेक अन्य कुनै कुरा नभए पनि अहिले प्रधानमन्त्रीकै कुर्सीमा बसेर सो अभिव्यक्ति दिएकोले सह्यै नहुने लिङ्देनले बताउनुभयो ।
प्रधानमन्त्रीको सो अभिव्यक्तिको विरोध गर्दा प्रतिपक्षीलाई गम्भीर आक्षेप लगाउने काम गरिएको भन्दै उहाँले आलोचना गर्नुभयो । प्रतिपक्षी दल मिटरब्याजीको पक्षमा छन् भन्ने खालको भ्रम फिँजाउने काम भएको उहाँले बताउनुभयो । ‘राजीनामा दिने नदिने हाम्रो दबाबले मात्र हुने कुरा होइन, यो प्रधानमन्त्रीको नैतिकताको सवाल हो, यो भन्दा ठुलो नैतिकताको अर्को प्रश्न उठ्न सक्दैन’, उहाँले भन्नुभयो ।
