काठमाडौं । प्रधानमन्त्री पुष्पकमल दाहाल प्रचण्डले आफूलाई प्रधानमन्त्री बनाउन भारतीय नागरिक सरदार प्रितम सिंह दिल्ली धाएको कुरा सार्वजनिक रूपमा नबोलेको भए हुने भन्दै आत्मालोचना गर्नुभएको छ ।
सोमबार प्रतिनिधि सभा बैठकमा बोल्दै प्रचण्डले आफूले भावनामा बगरे त्यो कुरा गरेको स्वीकार गर्नुभएको छ । ‘थोरै भावनामा म आएँ, मैले त्यो कुरा नभनेको भए हुन्थ्यो, भन्नुपर्ने जरुरी थिएन, तर मैले भनेँ, मनमा आयो भनेँ’, उहाँले भन्नुभयो ।
प्रधानमन्त्रीको हैसियतले आफू त्यस्तो भाषा बोल्नु नहुने उहाँले स्विकार्नुभएको छ । आफ्नी छोरी बिरामी पर्दा प्रितम सिंहले गरेको सहयोगलाई सम्झिएर आफू भावनामा बगेको प्रचण्डले बताउनुभयो । ‘यति सहज र स्वाभाविक कुरा, प्रधानमन्त्रीको हैसियतले मैले नबोल्नु पर्दथ्यो, म ज्ञानुको बुबा भएर बोल्न पुगेँ’, उहाँले भन्नुभयो ।
दाहालले आफूलाई दिल्लीले प्रधानमन्त्री बनाएको भनेर दिएको अभिव्यक्तिलाई लिएर आत्मसमीक्षा गर्ने पनि उहाँले बताउनुभयो । उहाँले आफ्नो सबल पक्ष वा कमजोरी जे भने पनि सार्वजनिक र निजी कार्यक्रममा फरक रूपमा प्रस्तुत हुन धेरै गाह्रो हुने गरेको बताउनुभयो । ‘निजी जस्तै सार्वजनिक अभिव्यक्तिमा पनि म मनले बोल्छु, बोल्न त राजनीतिज्ञले अझ प्रधानमन्त्रीले मनले भन्दा दिमागले बोल्नु पर्ने हो’, उहाँले भन्नुभयो ।
आफ्नो मन र नियत नियत सफा भएकोले भित्र र बाहिरका अभिव्यक्ति समान हुने उहाँले स्पष्टीकरण दिनुभयो । ‘म आत्मसमीक्षा गर्न चाहन्छु, भविष्यमा सतर्क हुन उत्प्रेरित गरेको ठानेको छु’, उहाँले भन्नुभयो ।
आफ्नो भावुकताले अब काम गर्दैन भन्ने कुरा आफूलाई थाहा भए पनि आफू भावुकतामा वहने गरेको उहाँले बताउनुभयो । प्रतिपक्षले आफूलाई यस विषयमा सचेत गराएको भन्दै प्रचण्डले अब आत्मसमीक्षा गरेर अघि बढ्ने बताउनुभयो ।
