काठमाडाैं । नेपाली कांग्रेसकी सांसद् आरजु राणाले नक्कली भुटानी शरणार्थी प्रकरणलाई लिएर आफूमाथि षड्यन्त्र गर्न खाेजिएकाे बताउनुभएकाे छ ।
साेमबार संघीय संसद् भवन परिसरमा सञ्चारकर्मीसँग कुरा गर्दै सांसद् राणाले आफूलाई रकम दिइएको भन्ने अडिओ योजनावद्ध रुपमा रेकर्ड गरिएको दाबी गर्नुभयाे । प्रहरीकाेमा भएकाे टेप कसरी बाहिर आयाे भन्ने प्रश्न समेत उहाँले गर्नुभयाे ।
अभियुक्तले बयानको क्रममा गलत भनेको अडियो प्रहरीकाेबाट कसरी बाहिर ल्याइयाे भन्दै सांसद् राणाले प्रश्न गर्नुभयाे । 'प्रहरीकोमा भएको टेप जुन ४ गते नै त्यो मान्छेले म उहाँलाई चिन्दिनँ भनेर वैशाख ४ गते उसको बयान रेकर्ड भएको रहेछ, त्यो पनि अदालतमा दिएको डकुमेन्टमा सावित छ, ४ गते उसले म चिन्दिनँ भनेको टेप १६ गते कसरी प्रहरीबाट बाहिर आयो ? यो मेरो लागि पनि ठूलो प्रश्न हो, भोलि कसैलाई साजिसमा फसाउने हो भने यो गलत हो भन्ने थाहा पाउँदा पाउँदै किन बाहिर प्रेसमा लिक भयो भन्ने कुरा प्रश्न चिन्ह मेरो मनमा छ, मैले बाहिर आउनुपर्छ भनेको कुरा त कसले बोलेको पो बाहिर आउनुपर्छ भनेको हो, जब उनीहरूलाई थाहा थियो कि यसमा तथ्य छैन भनेर, त्यो किन बाहिर आयो ? तथ्य होइन भनेको कुरालाई कसरी बाहिर ल्याइयाे ? किन बाहिर ल्याइयो ? मप्रति साजिस हाे ?'- उहाँले प्रश्न गर्नुभयाे ।
आरोपितले अदालतमा दिएको बयानमा आफ्नाे नाम नलिएकाे उहाँले बताउनुभयाे । 'त्यो मान्छे याे केसमा मुछिएकै मान्छे हो, तर उसले जे भनेको छ चाहीँ गलत भनेको छ र उसले आफैं पनि स्वीकार गरेको छ, दुई वटा मान्छेको नाम लिएको छ, एक जना बुढाथोकी र एक जना रेग्मी भन्नेले यो योजनामा मलाई यसोयसो भन भनेर मैले भनेको हो, म उहाँलाई चिन्दिनँ भनेर उहाँले प्रहरीमा पनि त्यही बयान दिनुभएको छ, अदालतमा पनि त्यही बयान दिनुभएको छ, तपाइँहरुले त्याे काेर्टबाट लिन सक्नुहुन्छ'- उहाँले भन्नुभयाे ।
अमरेशकुमार सिंह विरुद्ध आफूले मानहानीको मुद्दा दर्ता गराएको विषयमा सांसद् राणाले आफूमाथि लगाइएको आरोपहरू पुष्टि गर्न चुनौती दिनुभयाे । 'नखाएकाे विष लाग्दैन साथीहरु हाे, अमरेश सिंह पहिला पनि बढबढाउँथ्याे, उसले मलाई लगाएकाे आराेपहरु पुष्टि गरेर देखाओस्'- उहाँले भन्नुभयाे ।
