काठमाडौं । स्वास्थ्य तथा जनसङ्ख्या मन्त्री मोहनबहादुर बस्नेतले स्वास्थ्यकर्मी दुर्गम ठाउँमा नजाने समस्या गम्भीर समस्या रहेको बताउनुभएको छ ।
बिहीबार राष्ट्रिय सभा बैठकमा बोल्दै बस्नेतले स्वास्थ्यकर्मीलाई आफ्नो दरबन्दी तोकिएको ठाउँमा पठाउनको लागि ठुलै अप्रेसन चलाउनु पर्ने बस्नेतले बताउनुभयो । अलिअलि मिलाएको भरमा मिल्ने अवस्था नरहेको उहाँको भनाइ छ । ‘८ सय मान्छेहरू स्वास्थ्य मन्त्रालयमा काजमा बसेका छन्, म जस्तै मन्त्रीहरूले राख्नुभएको हो, त्यसमा अलिकता च्याखे हानेर अरू कर्मचारीले थप्नुभयो होला’, उहाँले भन्नुभयो ।
यस्तै गतिमा स्वास्थ्य मन्त्रालय चल्ने अवस्था नरहेको उहाँले बताउनुभयो । ‘यसलाई कडाइका साथ कदम चालेन भने स्वास्थ्य मन्त्रालय सुधार्न सक्ने अवस्था छैन, आजसम्म जेनतेन चलेको थियो, अब चल्नेवाला छैन’, उहाँले भन्नुभयो ।
बेथितिसँग कर्मचारी नियुक्ति गरेर १० महिनासम्म कर्मचारीले तलब समेत खान नपाएको उहाँले बताउनुभयो । फाजिलमा बसेका कर्मचारीलाई अब धान्न सक्ने अवस्था नरहेको उहाँले प्रष्ट पार्नुभयो ।
आफ्नो दरबन्दीमा जान भन्दा स्वास्थ्यकर्मीले आत्महत्या गर्छु भनेर सचिवहरूलाई थर्काउने गरेको बस्नेतले बताउनुभयो । मन्त्रालयका सचिव र आफ्नो सचिवालयमा समेत धम्कीपूर्ण फोन आउने गरेका उहाँले सुनाउनुभयो ।
स्वास्थ्य बिमामा समेत गम्भीर बेथिति रहेको बस्नेतले बताउनुभयो । यसलाई थिति बसाउनको लागि उचित कार्यविधि बनाएर समस्या समाधान गर्ने उहाँले प्रष्ट पार्नुभयो । बिरामी नपरेको मानीहरूबाट मनलाग्दी रकम असुल गरेर स्वास्थ्य बिमालाई भन्सार नबनाइयोस् भन्ने तर्फ सतर्क हुनुपर्ने बस्नेतले बताउनुभयो ।
