काठमाडौं । परराष्ट्र मन्त्री नारायणप्रकाश साउदले सरकार नेपालको असंलग्न परराष्ट्र नीतिबाट विचलित नभएको बताउनुभएको छ ।
बिहीबार राष्ट्रिय सभा बैठकमा बोल्दै मन्त्री साउदले नेपालको संविधानले निर्दिष्ट गरेको परराष्ट्र नीति सञ्चालनको मूलभूत नीतिबाट सरकार विचलित नभएको दाबी गर्नुभयो । नेपालको सार्वभौमिकता र पारस्परिक लाभलाई आधार मानी सरकारले परराष्ट्र नीतिलाई अघि बढाएको उहाँले बताउनुभयो ।
विश्वका जल्दा बल्दा राजनीतिक मुद्दामा असंलग्न राष्ट्रको नीतिलाई सरकाले जोड दिएको उहाँले बताउनुभयो । परराष्ट्र नीति २०७७ मा उल्लेख भए बमोजिम सरका अघि बढ्ने र त्यसलाई अझ परिमार्जित र परिष्कृत बनाएर लैजाने साउदले सभालाई जानकारी दिनुभयो । ‘असंलग्न परराष्ट्र नीति नेपालले अपनाउँदै आएको छ’, साउदले भन्नुभयो ।
सबल आर्थिक कूटनीतिलाई प्रभावकारी बनाउने सरकारको नीति रहेको उहाँले बताउनुभयो । सामाजिक र आर्थिक विकासमा सहयोग पुग्ने गरी आर्थिक कूटनीति अघि बढाइएको उहाँले जानकारी दिनुभयो ।
विभिन्न समयमा गठन भएका परराष्ट्र नीति सम्बन्धी कार्यदलले दिएका सुझावका आधारमा सरकारको परराष्ट्र नीति अघि बढेको उहाँले बताउनुभयो । यसले नेपालको परराष्ट्र सम्बन्ध थप सुधार भएको उहाँले दाबी गर्नुभयो ।
विदेश जाने नेपालीको संख्या बढ्दै गएकोले राहदानीको माग दिनानुदिन बढ्दै गएको उहाँले बताउनुभयो । दिनानुदिन माग बढ्दै गएकोले कम्तीमा पाँच वर्षसम्मको लागि राहदानी पुस्तिका अभाव हुन नदिने गरी टेण्डर आह्वान गर्न लागिएको उहाँले प्रष्ट पार्नुभयो ।
