काठमाडौं । महिला बालबालिका तथा ज्येष्ठ नागरिक मन्त्री सुरेन्द्रराज आचार्यले सो मन्त्रालयमा पुँजीगत भन्दा चालु खर्च बढी भएको बताउनुभएको छ ।
बिहीबार राष्ट्रिय सभा बैठकमा बोल्दै मन्त्री आचार्यले मन्त्रालय भित्रका पुँजीगत खर्चका कार्यक्रम सामान्य प्रकृतिका रहेकाले चालु खर्च बढी देखिएको बताउनुभयो ।
दुईवटा ठुला आयोजना अघि बढाउन नसक्दा मन्त्रालयको पुँजीगत खर्च कम भएको उहाँले बताउनुभयो । ‘काठमाडौंको गोठाटारमा अस्पताल सहितको वृद्धाश्रम र तनहुँको ढकालटारमा बाल सुधार गृह निर्माण गर्ने कार्यक्रम रहेको थियो, गोठाटारमा अस्पताल सहित वृद्धाश्रम बनाउन छुट्याइएको जग्गामा सुकुम्वासी बस्ती भएको कारणले साइड क्लियर हुन नसकेका कारण निर्माण चरणमा जान सकेन, ढकालटारमा निर्माणाधीन बाल सुधार गृहको बहुवर्षीय आयोजना स्वीकृतिको लागि आवश्यक बजेट विनियोजन नहुँदा ठेक्का लाग्न सकेन’, उहाँले भन्नुभयो ।
मन्त्रालयले ज्येष्ठ नागरिक मिलन केन्द्रहरू निर्माणको योजना बनाएको भए पनि अर्थ मन्त्रालयले बजेट नदिएको कारण काम नभएको उहाँले बताउनुभयो । बजेट सङ्कुचनको कारण सो कामको लागि बजेट नआएको उहाँको भनाइ छ ।
