काठमाडौं । संस्कृति, पर्यटन तथा नागरिक उड्डयन मन्त्री सुदन किराँतीले जहाज खरिद गर्नु राष्ट्रिय आवश्यकता भएको दाबी गर्नुभएकाे छ ।
बिहीबार बसेकाे राष्ट्रिय सभा बैठकमा आर्थिक वर्ष २०८०-०८१ को बजेटमाथिको छलफलमा उठेका प्रश्नकाे जवाफ दिँदै मन्त्री किराँतीले जहाज खरिद गर्नु आफ्नो निजी स्वार्थको विषय नभएर राष्ट्रिय आवश्यकता भएको दाबी गर्नुभयाे ।
नेपालको प्रचलित कानून अनुसार पारदर्शी ढंगले जहाज खरिदको प्रक्रिया अघि बढाउन आफूले निर्देशन दिइसकेकाे उहाँले बताउनुभयाे । 'जहाज खरिद मेराे निजी स्वार्थको विषय हुँदै हाेइन, राष्ट्रिय आवश्यकता हाे, कुन प्रक्रियाबाट खरिद गर्ने भन्ने निगमकै विज्ञ र पदाधिकारीले निर्धारण गर्ने कुरा हाे, आवश्यक परे सरकारले सहजीकरण मात्र गर्छ, नेपालकाे प्रचलित कानुनअनुसार पारदर्शी ढंगले जहाज खरिदकाे प्रक्रिया अगाडि बढाउन मैले निर्देशन गरिसकेकाे छु'- मन्त्री किराँतीले भन्नुभयाे ।
नाफा नहुने भएपछि निजी क्षेत्र दुर्गममा जहाज सञ्चालन गर्न अनिच्छुक देखिएकाले निगमले नै ३ वटा जहाज किन्नुपर्ने अवस्था आएकाे उहाँले दाबी गर्नुभयाे । मन्त्री किराँतीले भन्नुभयाे - 'दुर्गम क्षेत्रमा संख्यात्मक हिसाबले धेरै विमानस्थल निर्माण भएका छन्, तर त्यस क्षेत्रमा उड्ने हवाइजहाजकाे कमीले नियमित उडान गर्न नसक्दा विमानस्थलकाे औचित्यमाथि प्रश्न उठ्नु स्वभाविक हाे, त्यस क्षेत्रमा उडान गर्दा नाफा नहुने भएकाले निजी क्षेत्र त्यसतर्फ उडान सञ्चालन गर्न आकर्षित देखिँदैन, यसै तथ्यलाई मध्यनजर गर्दै नेपाल वायु सेवा निगमले ३ वटा साना जहाज खरिद गर्ने प्रक्रिया अगाडि बढाएकाे छ ।'
विमानस्थलकाे संख्या थप्ने भन्दा पनि भएका विमानस्थकाे सेवा र गुणस्तर बढाउनुपर्ने मन्त्री किराँतीले बताउनुभयाे । पाेखरा अन्तर्राष्ट्रिय विमानस्थलमा हालै सिचुवान एयरलाइन्सले चीनकाे छेन्दु शहरबाट चार्टर उडान सुरु गरेकाे भन्दै उहाँले यसले व्यवसायिक उडानकाे ढाेका खाेलेकाे मन्त्री किराँतीले बताउनुभयाे । नयाँ रुटबारे भारतकाे प्राविधिक टाेलीसँग कुरा गरेकाे भन्दै मन्त्री किराँतीले प्रधानमन्त्रीकाे भारत भ्रमणमा कुरा उठेकाे उहाँले बताउनुभयाे ।
निजगढ अन्तर्राष्ट्रिय विमानस्थल भविष्यमा काठमाडाैंकाे वैकल्पिक विमानस्थल भएकाे भन्दै मन्त्री किराँतीले भविष्यमा यसकाे आवश्यकता अझै बढेर जाने बताउनुभयाे । आर्थिक वर्ष ०८०-८१ मा साे विमानस्थल निर्माण कार्य सुरु हुने अपेक्षा राखिएकाे समे उहाँले बताउनुभयाे ।
स्थानीय तहसँगकाे पर्यटन पूर्वाधार विकास तथा साझेदार कार्यक्रम स्राेत सुनिश्चित नहुँदा त्यसलाई निरन्तरता दिन नसकिएकाे मन्त्री किराँतीले बताउनुभयाे ।
पशुपति गुरुयाेजना स्वीकृत भएर कार्यान्वयनमा अघि बढेकाे र लुम्बिनी गुरुयाेजना अनुसार नै संरचना निर्माण गर्ने निर्देशन दिइसकिएकाे उहाँले बताउनुभयाे । पुरानाे गाउँकाे खाेजी, माैखिक ज्ञान संग्राहलय, सांस्कृतिक र सम्पदा गाउँ निर्माण, सबै जातजातिका संग्रहालय, युद्ध संग्रहालाय बजेट नहुँदा कार्यक्रममा ल्याउन नसकिएकाे मन्त्री किराँतीले बताउनुभयाे ।
बजेट असन्तुलित रहेकाे भन्दै मन्त्री किराँतीले सांसद्हरुकाे अपेक्षालाई सम्बाेधन गर्न नसकिएकाे बताउनुभयाे । अघिल्लाे वर्ष भन्दा ४५ प्रतिशत बजेट कटाैती भएकाे भन्दै उहाँले बजेटले धेरै कार्यक्रम समेट्न खाेज्दा एकातिर असन्तुलन र अर्काेतिर सानाे भएकाे बताउनुभयाे ।
संघीय कार्यक्रम कसरी कार्यान्वयन गर्ने भनेर चिन्ता बढेकाे मन्त्री किराँतीले बताउनुभयाे । 'उभिएर बाेल्न अप्ठेराे महशुस भइरहेकाे छ, संघीय लाेकतान्त्रिक गणतन्त्र आएकाे १५ वर्षमा पनि विकासकाे राष्ट्रिय माेडालिटी निर्माण गर्न नसक्दा हामीले दु:ख पाइराखेका छाैं, संघकाे मन्त्रालयबाट छुटेकाे ताप्लेजुङकाे ५ लाख र दार्चुलाकाे ५ लाख बजेटलाई कसरी टेण्डर गरेर कार्यान्वयन गर्नेहाेला गम्भीर प्रश्न उठेकाे छ'- उहाँले भन्नुभयाे ।
