काठमाडाैं । नेकपा एमालेका सांसद् रघुजी पन्तले मिटरब्याजसम्बन्धी विधेयक सरकारले अघि बढाउन नचाहेको बताउनुभएकाे छ ।
शुक्रबार बसेकाे प्रतिनिधि सभा बैठकमा बाेल्दै सांसद् पन्तले एमालेका कारण विधेयक पास भएन भनेर भ्रम फेलाउँदै हिड्ने सरकारले सदन चल्दा पनि मिटरब्याजसम्बन्धी विधेयक अघि बढाउन नचाहेको बताउनुभयाे ।
आफूले विधेयक नल्याउने तर दोष एमालेप्रति लगाउने कुरा उचित नभएको - 'कार्यसूची हेर्दा अचम्म लाग्याे, आज माननीय उपप्रधान तथा गृहमन्त्री पनि देखिनुभएन, उहाँले बडा जुलुशसमा गएर, धर्ना बसेकाे ठाउँमा गएर, एमालेले राेकेपनि म याे विधेयकलाई अगाडि बढाउछु भन्नुभाथ्याे, एमालेले हाउस अवरुद्ध गरेर विधेयक राेक्याे भनेर सत्तापक्षले भ्रम छर्ने प्रयास गर्याे, आज हामीले हाउस राेकेका छैनाैं, विधेयक त छैन त ? कहाँ गयाे ? कसले राेक्याे ? कता हिँड्याे त्याे विधेयक ? आएर जवाफ दिनुपर्याे नि सम्बन्धित मन्त्रीले ।'
आफूले विधेयक नल्याउने तर दोषजति एमालेमाथि लगाउने सत्तापक्षकाे रवैया उचित नभएकाे सांसद् पन्तले बताउनुभयाे । उहाँले भन्नुभयाे - 'विधेयक आफू नल्याउने अनि दाेष प्रतिपक्षकाे थाप्लामा हाल्ने ? याे गलत हाे ।'
नेपालको गीत-संगीत यहाँको सौम्य शक्ति (सफ्ट पावर) लाई सरकारले उपेक्षा गरेको सांसद् पन्तले बताउनुभयाे । नेपाल संगीत तथा नाट्य प्रज्ञा प्रतिष्ठानलाई भवन बनाउन दिएको १५ रोपनी जग्गा पनि व्यापारीलाई लिजमा दिइएकाेप्रति उहाँले आपत्ति जनाउनुभयाे । संगीत नाट्य प्रतिष्ठानको भवनका लागि छुट्टाएकोग्गा निजी क्षेत्रलाई भाडामा दिन तयार हुने सरकारले संस्कृतिको जगेर्नाका लागि कुनै काम गर्न नसकेकाे सांसद् पन्तले बताउनुभयाे ।
राजा महेन्द्रकाे गीतसंगितप्रतिकाे माेह स्मरण गर्दै उहाँले आफू राजतन्त्रवादी नभएपनि गणतन्त्रवादीहरुले राम्रा काम राजाहरुबाट पनि सिक्न हुने समेत बताउनुभयाे ।
तनहुँमा आदिकवि भानुभक्त आचार्यकाे घर खण्डहरु भएकाे भन्दै उहाँले पुर्ननिर्माण गर्न पनि सरकारकाे ध्यानाकर्षण गराउनुभयाे ।
