काठमाडाैं । राष्ट्रिय स्वतन्त्र पार्टी (रास्वपा) की सांसद् सुमना श्रेष्ठले केही नेपाल ऐनलाई संशोधन गर्न बनेको विधेयक, २०८० असंवैधानिक रहेकाे बताउनुभएकाे छ ।
आइतबार बसेकाे प्रतिनिधि सभा बैठकमा बाेल्दै सांसद् श्रेष्ठले संविधानविपरीतकाे साे विधेयक कानुन न्याय तथा संसदीय मामिला मन्त्रालयबाट पास भयाे भन्दै प्रश्न गर्नुभयाे ।
साे विधेयक कानुनी सिद्धान्त र विगतका नजिर विपरीत रहेकाे उहाँले बताउनुभयाे । 'राजनीतिको नाममा कसलाई बचाउन ल्याएको ऐन हो यो ? विधेयक हाे ? इँट्टा भट्टामा मान्छे पोल्नेलाई बचाउन ल्याएको हो यो ऐन ? की एम्बुलेन्सबाट मान्छे थुतेर मार्नेलाई बचाउन ल्याएको हो यो विधेयक ? की भाला रोपेर मान्छे मार्नेलाई बचाउन ल्याएको हो यो विधेयक ?'- सांसद् श्रेष्ठले भन्नुभयाे ।
साे विधेयक नेपालीकाे लागि नल्याइएकाे भन्दै उहाँले जस्ताेसुकै अपराधलाई पनि राजनीतिकाे नाम दिएर कुकर्म र अपराधलाई प्रश्रय र संरक्षण गर्न नपाइने बताउनुभयाे । आयाेगमाथि आयाेग बनाउने तर छानबिन नै नबनाउने काम भइरहेकाे भन्दै सांसद् श्रेष्ठले अपराधलाई पखाल्ने गंगाजल सदन नभएकाे बताउनुभयाे ।
अपराधलाई राजनीतिकरण र निस्वार्थ भावले गर्नुपर्ने राजनीतिलाई अपराधीकरण गर्ने गरी विधेयक ल्याइएको उहाँले बताउनुभयाे । अपराधी र राजनीतिज्ञकाे परिभाषालाई नै धमिल्याउने समेत सांसद् श्रेष्ठले बताउनुभयाे । 'यो विधेयक ल्याएर मालिक बन्न खोज्ने ? हामीले नेपाली जनतालाई भन्छाैं - यो संविधानको विपरीत छ, यो विधेयक पास भयो भने मुद्दा हाल्नुहोस्, दण्डहीनताको देश नेपाल होइन, हिंसाको च्याप्टर सकियो, अब हिंसालाई कुनै दलको राजनीतिक आडमा चोख्याउन पाइँदैन'-उहाँले भन्नुभयाे ।
