काठमाडाैं । राष्ट्रिय सभाका उपाध्यक्ष उर्मिला अर्यालले संघीय संसद् सचिवालयमा आफ्नाे सम्पत्ति विवरण बुझाउनु भएको छ ।
उपाध्यक्ष अर्यालले सचिवालयको सांसद् सुविधा व्यवस्थापन शाखामा साेमबार आर्थिक वर्ष २०७९-८० को सम्पत्ति विवरण बुझाउनुभएको संसद् सचिवालयले जनाएकाे छ । उहाँले बुझाउनुभएको सम्पत्ति विवरणको दर्ता नम्बर-१ छ ।
उपाध्यक्ष अर्यालले आफ्नो सम्पत्ति सार्वजनिक समेत गर्नुभएको छ । उहाँले सार्वजनिक गर्नुभएकाे सम्पत्ति विवरणमा काठमाडौंको बूढानीलकण्ठमा ४ करोडको घडेरी रहेकाे उल्लेख छ । बालकोटको घर जग्गा बेचेको पैसा र सावल सहकारी संस्थाबाट २ करोड ५३ लाख रुपैयाँ ऋण लिएर बूढानीलकण्ठ नगरपालिका-४ मा १८ आना घडेरी ४ करोडमा किनेको उपाध्यक्ष अर्यालले आफ्नाे सम्पत्ति विवरणमा उल्लेख गर्नुभएकाे छ ।
उहाँले प्युठान नगरपालिका-४ मा २ रोपनी घडेरी र १३ रोपनी जग्गा श्रीमान यमबहादुर थापाको नाममा रहेकाे उल्लेख गर्दै उहाँले साे पैतृक सम्पत्ति भएकाे विवरणमा लेख्नुभएकाे छ । पर्साकाे विरगञ्ज महानगरपालिका-१४ मा ३ कठ्ठा ८ धुर जग्गा श्रीमान यमबहादुरको नाममा रहेको र साे जग्गा श्रीमान र आफ्नाे आयबाट खरिद गरेकाे उपाध्यक्ष अर्यालले उल्लेख गर्नुभएकाे छ ।
दाइजाेबाट पाएकाे सुनको गहना १२ तोला, हिराको गहना १ सेट र निलमको गहना १ सेट रहेकाे पनि उहाँले उल्लेख गर्नुभएकाे छ । स्वआर्जन र श्रीमानको आर्जन तथा उपहारबाट प्राप्त गरेकाे गरेर चाँदी कुल अन्दाजी ३०० तोला रहेकाे पनि उपाध्यक्ष अर्यालले सम्पत्ति विवरणमा उल्लेख गर्नुभएकाे छ ।
एभरेष्ट बैंक र राष्ट्रिय बाणिज्य बैंकमा गरेर जम्मा कुल ७४ हजार नगद रहेकाे पनि उहाँले उल्लेख गर्नुभएकाे छ । एभरेष्ट बैंकको ४ सय कित्ता साधारण शेयर, साहस ऊर्जा कम्पनी लिमिटेडमा २ सय कित्ता शेयर, अन्य विभिन्न कम्पनीमा ३ सय कित्ता शेयर रहेको उपाध्यक्ष अर्यालले उल्लेख गर्नुभएकाे छ ।
श्रीमान यमबहादुरको नाममा हिमालयन ऊर्जा कम्पनीमा २८ हजार कित्ता शेयर रहेको उल्लेख गर्दै उहाँले स्वआर्जन र श्रीमानको आर्जनबाट ती विभिन्न कित्ताका शेयर खरिद गरेको उल्लेख गर्नुभएकाे छ ।
वीरगंजको २ कठ्ठा जग्गा, भक्तपुरको चाँगुनारायणको १ रोपनी र दुवाकोटको १० आना जग्गा बेचेर २ करोड ३० लाख ऋण तिरिसकेको र अझै २३ लाख ऋण तिर्न बाँकी रहेको समेत उपाध्यक्ष अर्यालले सम्पत्ति विवरणमा उल्लेख गर्नुभएकाे छ । उहाँले एउटा ल्यापटप र ३ वटा टिभी तथा फर्निचरका सामानहरु पनि आफूसँग रहेका सम्पत्ति विवरणमा उल्लेख गर्नुभएकाे छ ।
भ्रष्टाचार निवारण ऐन, २०५९ को दफा ५० को उपदफा (१) तथा अख्तियार दुरुपयोग अनुसन्धान आयोग ऐन, २०४८ को दफा ३१ क को उपदफा (१) को प्रयोजनको लागि सार्वजनिक पदमा रहेका हरेक व्यक्तिले हरेक आर्थिक वर्षको व्यक्तिगत सम्पत्ति विवरण बुझाउनुपर्ने हुन्छ ।
यसैबीच संघीय संसद् सचिवालयले सूचना प्रकाशित गरी साउन १ गतेदेखि भदौ २८ गतेभित्र सम्पत्ति विवरण बुझाउन संघीय संसद्का दुवै सदनका सदस्यहरुलाई अनुरोध गरेको छ ।
