काठमाडाैं । राष्ट्रिय सभा सदस्य रमेशजंग रायमाझीले त्रिभुवन अन्तर्राष्ट्रिय विमानस्थलबाट भन्सार पास भइसकेकाे सयाैं किलाे सुन बरामद हुनु लाजमर्दाे विषय भएकाे बताउनुभएकाे छ ।
बिहीबार बसेकाे राष्ट्रिय सभा बैठककाे विशेष समयमा बाेल्दै सांसद् रायमाझीले ३३ किलो सुन प्रकरण सेलाउन नपाउँदै सयौं किलो सुन बरामद हुनु लाजमर्दो कुरा भएको बताउनुभयाे ।
सय किलो सुन अवैध रुपमा भित्रिंदा विमानस्थलकाे भन्सार कार्यालयका कर्मचारी र प्रहरी प्रशासन कहाँ गएकाे थियाे भन्ने प्रश्न उहाँले गर्नुभयाे । 'त्रिभुवन अन्तर्राष्ट्रिय विमानस्थलमा तिमी कसरी छिर्याै भनेर कुख्यात अपराधी चार्ल्स शाेभराजलाई साेध्दा उनले तिम्राेमा त सिंगाे हात्ती छिराइदिन्छु भनेका थिए त्याे मलाई स्मरण भयाे, सयाैं किलाे सुन निस्किन्छ, ३३ किलाे सुनकाण्ड सेलाउन नपाउँदै आज सयाैं किलाे सुन, एकपटक हाेइन २२ पटक यस्ताे भयाे भन्नेछ, सय किलाे सुन निक्लिँदा त्यहाँका कर्मचारीले के गर्दै थिए ? हामीले एउटा मोबाइल, लगाएको घडी कुनै बेला खोलेर कोर्टको गोजीमा हालेर त्यो मेसिनबाट छिर्दा डिटेक्टर कराउँछ, १०० किलो सुन निस्कँदा डिटेक्टर किन कराएन ? त्यहाँकाे भन्सारका कर्मचारीहरु के गरिरहेका थिए ? त्यहाँकाे पुलिस के गरिरहेकाे थियाे ?'- सांसद् रायमाझीकाे प्रश्न छ ।
सय किलो सुन अवैध रुपमा भित्रिंदा अन्तर्राष्ट्रियस्तरमा नेपालको छवि धुमिल भएकाे भन्दै उहाँले चिन्ता व्यक्त गर्नुभयाे 'हामीले लाज मान्नुपर्छ कि पर्दैन ? संसारभरी पुग्छ याे न्यूज, हामी सरकार चलाउँदैछाैं कि तस्कर गर्दैछाैं, जनतालाई राहत दिन खाेज्दैछाैं कि आहात ? आर्थिक मन्दी भइरहेका बेला राजश्व टाइट गर्न खाेज्दैछाैं कि खुल्ला गर्न खाेज्दैछाैं ?'- उहाँकाे प्रश्न छ ।
भन्सारको कर्मचारी र प्रहरीको मिलेमतोबिना भन्सारबाट सुन कटाउन सम्भव नहुने समेत सांसद् रायमाझीले बताउनुभयो । ललिता निवासको काण्डमा टिप्पणी उठाउँदा अधिकृतलाई कारबाही गर्ने प्रशासन १०० किलो सुन निस्कँदा प्रहरीको उपस्थिति नदेखिएको उहाँले बताउनुभयो । 'आज सय किलाे सुन निस्कँदा नेपालकाे पुलिस कहाँ गयाे ? भन्सारकाे कर्मचारी र पुलिसकाे मिलेमताेबिना याे सम्भव छैन'- सांसद् रायमाझीले भन्नुभयाे ।
मुलुकलाई अपराधिक क्रिडास्थल बनाउन खोजिएको भन्दै सरकार सचेत हुनुपर्ने उहाँले बताउनुभयाे । 'यस्ता मान्छेसँग साँठगाँठ छ भने सरकारले सदनमा भन्नुपर्याे, हाेइन भने सरकारका मान्छेले यस्ता मान्छेलाई कारबाही गर्नुपर्याे, हिजाे मात्रै त्याे पक्राउ पर्याे, अस्तीकाे दिनमा छाेडिएकाे हुन सक्छ'- सांसद् रायमाझीले भन्नुभयाे ।
राजस्व चुहावट राेक्नका लागि गम्भीर हुन उहाँले अर्थमन्त्रालय र गृहमन्त्रालयकाे ध्यानाकर्षण गराउनुभयाे । भन्सारकाे डिजी र पुलिसकाे डीआइजीकाे सहयाेगबिना साे सामान पास हुनै नसक्ने सांसद् रायमाझीले बताउनुभयाे । साे प्रकरणमा संलग्न सबैलाई कारबाहीकाे दायरामा ल्याएर दाेषीलाई सजाय र निर्दाेषलाई सफाइ दिनुपर्ने उहाँले बताउनुभयाे ।
सांसद् रायमाझीले सरकारलाई संवेदशील हुन र जनताप्रति जवाफदेही हुन पनि आग्रह गर्नुभयाे ।
