काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले नेपाली समाज र मनोविज्ञान अपराधतर्फ उन्मुख भएको बताउनुभएको छ ।
नक्कली भुटानी शरणार्थी प्रकरण, ललिता निवास प्रकरण, सुन तस्करी लगायतका घटना त्यसैको परिणाम भएको उहाँले बताउनुभयो । ‘यो सामान्य विषय होइन, समाजलाई ठिक दिशामा ल्याउन पनि यसको ठिक छानबिन, जरासम्म पुग्न सक्नु पर्छ’, उहाँले भन्नुभयो ।
एक क्विन्टल सुनको सूचना दिने मान्छेसँग सो सुन कसले ल्याएको भन्ने सूचना पनि भएको उहाँले दाबी गर्नुभयो । सरकाले आकस्मिक रूपमा नभई नियमित रूपमा तस्करी हुने एक खेप देखाउनको लागि समातेको उहाँले बताउनुभयो । ‘नेपाल सुन तस्करको ट्रान्जिट बनिरहेको छ, अन्य देशको दबाबमा आएर यो पक्राउ परेको कुरा आएको छ’, उहाँले भन्नुभयो ।
भरियालाई पक्राउ गरेर नाइकेलाई जोगाउने काम नगर्न उहाँले आग्रह गर्नुभयो । छानबिन आयोग बनाएर सो घटनाको निष्पक्ष छानबिन गर्न उहाँले माग गर्नुभयो ।
नेपाली सेनालाई विवादमा ल्याउने गरी छलफल नगर्न पनि उहाँले आग्रह गर्नुभयो । लिङदेनले सेनालाई तलब खुवाउन आर्थिक सङ्कट भएको हो भने सांसदको सङ्ख्या घटाउन र प्रदेश सभा तथा राष्ट्रिय सभा खारेज गर्न सुझाव दिनुभयो ।
