काठमाडौं । प्रमुख प्रतिपक्षी नेकपा एमालेले सय किलो सुन तस्करी काण्डमा उच्चस्तरीय छानबिन समिति गठनकाे माग गरेकाे छ ।
सुन तस्करी काण्डबारे छानबिनका लागि उच्चस्तरीय समिति गठन गर्न माग गर्दै एमालेले बुधबार बसेकाे प्रतिनिधि सभा बैठक अवराेध गरेकाे छ ।
बुधबारकाे प्रतिनिधि सभा बैठकमा आकस्मिक समयकाे कार्यक्रम सकिएलगत्तै एमाले प्रमुख सचेतक पदम गिरीले सभामुखसँग समय लिएर बाेल्दै उच्चस्तरीय छानबिन समिति गठन गर्न माग गर्नुभयाे । सभामुखबाट समिति गठनका लागि रुलिङ नभए सदन अगाडि बढ्न नसक्ने चेतावनी समेत उहाँले दिनुभयाे । सुन काण्डमा सांसद्हरुले बाेल्न पाउने भनेर भनेपछि एमालेले सदासयता देखाएर आकस्मिक समयकाे कार्यक्रम अगाडि बढाउन दिएकाे प्रमुख सचेतक गिरीले बताउनुभयाे ।
उहाँले बाेलिसकेपछिसभामुख घिमिरेले बस्न अनुराेध गरेपनि एमाले सांसद्हरुले मानेनन् । उनीहरुले राेस्टममा आएर नाराबाजी गर्न थाले । त्यसपछि सभामुख घिमिरेले बैठकका बाँकी कार्यक्रम कार्यसूचीबाट हटाइएकाे जानकारी गराउनुभयाे । लगत्तै उहाँले प्रतिनिधि सभा बैठक साउन १५ गतेसम्मका लागि स्थगित गरिएकाे बताउनुभयाे ।
एमालेले त्रिभुवन अन्तर्राष्ट्रिय विमानस्थलबाट सय किलो सुन तस्करी भएको विषयमा गृहमन्त्रीले जवाफ दिनुपर्ने र चित्तबुझ्दाे जवाफ नदिए राजीनामा दिनुपर्ने माग गरेकाे छ । साे काण्डकाे छानबिनका लागि उच्चस्तरीय छानबिन समिति गठन हुनुपर्ने माग समेत एमालेले गरेकाे छ ।
