काठमाडाैं । नेकपा एमालेका सांसद् ठाकुर गैरेले एक क्विन्टल सुन तस्करी काण्डमा सरकारकै संलग्नता देखिएकाे बताउनुभएकाे छ ।
बुधबार बसेकाे प्रतिनिधि सभा बैठकमा बाेल्दै सांसद् गैरेले पछिल्ला घटनाक्रम हेर्दा सुन तस्करी काण्डमा सरकारकै संलग्नता देखिएकाे बताउनुभयाे ।
सदनमा सत्तापक्षले एक्कासी पशुपतिनाथ मन्दिरकाे जलहरीकाे विषय उठाउनु र सम्बन्धित निकायका प्रमुख एकैदिन बिदामा बस्नुले पनि यसकाे पुष्टि गर्ने उहाँले बताउनुभयाे ।
सदनमा जलहरी सुनकाे हाे कि पित्तलकाे हाे भनेर चर्चा चलाएर सरकारले नै त्रिभुवन अन्तर्राष्ट्रिय विमानस्थलबाट सुन तस्करी गरेकाे सांसद् गैरेले बताउनुभयाे । 'मलाई आज शंका लागिरहेकाे छ, संसद्मा पशुपतिनाथकाे जलहरीकाे चर्चा चलाएर सरकारले एयरपाेर्टमा सुन तस्करीकाे याेजना बनाइरहेकाे थियाे र सुन तस्करीकाे काम गरिरहेकाे थियाे'- उहाँले भन्नुभयाे ।
जलहरीबारे प्रश्न उठाउँदा आफूहरुले छानबिनकाे माग गरेकाे र छानबिन गर्दा पित्तल नभएर सुन भएकै पुष्टि भएकाे भन्दै सांसद् गैरेले एक क्विन्टल सुन काण्डबारे पनि सत्यतथ्य छानबिन गर्न सरकारसँग माग गर्नुभयाे । उहाँले भन्नुभयाे - 'केही समय अगाडि पशुपतिनाथमा चढाइएकाे सुन सुन हाेइन पित्तल हाे भनियाे, हामीले प्रतिपक्षकाे तर्फबाट सुन हाे कि पित्तल जाँच हाेस् भनेर छानबिनकाे माग गर्याैं, पित्तल हाेइन सुन हाे भन्ने पुष्टि भयाे, त्रिभुवन अन्तर्राष्ट्रिय विमानस्थलबाट सहज ढंगले निस्किएकाे सुन कसकाे हाे ? कसले ल्याएकाे हाे ? त्यसकाे सत्यतथ्य छानबिन हुनुपर्छ ।'
तस्करीकाे सुन भन्सार जाँच पास गरेर बाहिरिकै दिन अर्थ मन्त्रालय अन्तर्गतकाे भन्सार र गृह मन्त्रालयकाे प्रमुखलाई एकै दिन बिदा कसरी मिल्याे भन्ने प्रश्न समेत सांसद् गैरेले गर्नुभयाे । उहाँले प्रश्न गर्नुभयाे - 'सुन बाहिरिएकै दिन अर्थ मन्त्रालयकाे त्यहाँकाे मुख्य सम्हालेर बस्नुभएका प्रमुखले किन बिदा लिनुभयाे ? गृह मन्त्रालयकाे प्रमुखकाे जिम्मा लिएर बस्नुभएका प्रमुखले त्यही दिन कसरी बिदा पाउनुभयाे, एकैदिन दुवै प्रमुखले कसरी बिदा पाउनुभयाे ?'
अर्थमन्त्री डा. प्रकाशशरण महतले सुन पक्रने कर्मचारीलाई मैले पुरस्कारकाे घाेषणा गरेकाले सुन बरामद भएकाे भनेर अभिव्यक्ति दिनुभएकाे भन्दै सांसद् गैरेले प्रश्न गर्नुभयाे - 'त्याे पुरस्कार कसले पाए ? पुरस्कार पाउने मान्छे काे हुन् ? तिनीलाई पुस्कार दिलाउनका लागि सरकारले सुन बाहिर निकाल्ने अनुमति दिएकाे हाे ?'
गृहमन्त्री नारायणकाजी श्रेष्ठले यस काण्डमा कसैकाे अनुहार नहेरेकाे भनेर अभिव्यक्ति दिएकाे भन्दै उहाँले प्रश्न गर्नुभयाे - '२० हजार रुपैयाँ लिएर कम्पनी खाेल्न नागरिकता दिने मान्छे सुन तस्कर हाे ? उसैकाे एक्लाे प्रयासमा याे सम्भव भयाे ?'
सत्ता पक्षले विषयवस्तुलाई अन्त माेड्न खाेजेकाे बताउँदै सांसद् गैरेले भन्नुभयाे - 'त्यही कम्पनीले २२औं पटक सामान ल्याउँछ, २२औं पटककाे सामान पक्रिँदैन, ३२ पटकसम्म सुन तस्करी गरेर ल्याउँछ तर पक्रिँदैन, ३३ औं पटककाे सामान भन्सार पास भइसकेपछि बाहिर आएर पक्रिन्छ अनि अर्थमन्त्री भन्नुहुन्छ पुरस्कारकाे घाेषणा गरेकाले पक्राउ पर्याे, याे भन्दा लज्जाबाेध के हुन्छ ?'
आफूलाई गृहमन्त्री र अर्थमन्त्रीले नैतिकताको आधारमा राजीनामा दिने आशा रहेपनि त्यसाे हुन नसकेकाे उहाँले बताउनुभयाे । 'मलाई त आशा थियो, गृहमन्त्रीले मेरो मातहतको कार्यालयले यो सुन जहाँबाट पक्रिनुपर्थ्यो पक्रिन सकेन, त्यसकारणले यसको छानबिन नहुञ्जेलसम्म म गृहमन्त्रीको पदबाट बाहिर बस्छु भनेर गृहमन्त्रीले भन्नुहुनेछ, मलाई त आशा थियो अर्थमन्त्रीले मेरो मातहतको कार्यालयले यो सुन पक्रिन सकेन, त्यसकारणले यसको छानबिन नहुञ्जेलसम्म अर्थमन्त्रीबाट बाहिर बस्छु, नैतिक रुपले याे पदमा बस्न मिल्दैन भनेर उहाँहरुले भन्नुहुनेछ, म प्रश्न गर्छु नैतिक रुपले अर्थमन्त्री र गृहमन्त्री पदमा बस्न मिल्छ ?'- सांसद् गैरेकाे प्रश्न छ ।
सुनकाे तस्करी गर्नेहरुलाई सरकारले गिरफ्तार गर्न नसकेकाे भन्दै उहाँले गृहमन्त्रीले आजकाे बैठककाे सुरुमै यसबारे बाेल्नुहुने अपेक्षा गरेपनि त्यसाे हुन नसकेकाे बताउनुभयाे ।
सुन तस्करी काण्डले नेपालकाे अन्तर्राष्ट्रिय विमानस्थलकाे विश्वसनियतामाथि पनि प्रश्न उठेकाे भन्दै सांसद् गैरेले यसकाे छानबिनका लागि तत्काल उच्चस्तरीय छानबिन समिति बनाएर छानबिन गर्न माग गर्नुभयाे ।
