काठमाडौं । राष्ट्रिय सभा पनि प्रमुख प्रतिपक्षी नेकपा एमालेले सय किलाे सुन तस्करी काण्डमा उपप्रधान तथा गृहमन्त्री नारायणकाजीमाथि पनि छानबिन हुनुपर्ने माग गरेकाे छ ।
बिहीबार बसेकाे राष्ट्रिय सभा बैठककाे सुरुमै बाेल्दै एमाले संसदीय दलका नेता देवेन्द्र दाहालले गृहमन्त्री श्रेष्ठकाे संलग्नतामै साे सुनकाण्ड भएकाे आशंका व्यक्त गर्नुभयाे । उहाँले गृहमन्त्रीले राजीनामा दिएर अनुसन्धानलाई सहज बनाउनुपर्ने बताउनुभयाे ।
१ सय केजी सुन विमानस्थलबाट भन्सार पास भएर बाहिरिँदा पनि थाहा नपाउने सरकार र गृहमन्त्रीमाथि नै गम्भीर प्रश्न उठेकाे नेता दाहालले बताउनुभयाे । सिंगाे विमानस्थलकाे अवस्था कस्ताे छ, भन्सार चेकिङकाे अवस्था कस्ताे छ भनेर जवाफ दिने काम सरकारकाे रहेकाे बताउँदै नेता दाहालले भन्नुभयाे - 'यसकाे जवाफ कसले दिने हाे ? गृहमन्त्रीले हाेइन र ? अर्थमन्त्रीले हाेइन र ? सिंगाे याे सरकारले दिनुपर्ने हाेइन ? तर आफूले कुनै जवाफदेहिता लिनुनपर्नेगरी गृहमन्त्री निक्कै चुर्तिफूर्तिसाथ विमानस्थलमा जानुहुन्छ र कसैलाई छाँडिदैन भनेर मन्तव्य दिनुहुन्छ' - उहाँले भन्नुभयाे ।
विमानस्थलको सुरक्षा व्यवस्थालाई छिचोल्दै सय किलो सुन बाहिर आएकै दिन मैले सुरक्षा व्यवस्था चुस्त राख्न सकिन भनेर राजीनामा दिनुपर्नेमा गृहमन्त्रीले राजीनामा नदिएकाे उहाँले बताउनुभयाे । 'विमानस्थलको सुरक्षा व्यवस्थालाई छिचोल्दै सय किलो सुन बाहिर आएर पक्राउ पर्छ, त्यसै दिन मैले सुरक्षा व्यवस्थालाई बलियो बनाउन सकिन भनेर विमानस्थल भन्सारसम्बन्धी सुरक्षाकर्मीलाई सस्पेन्ड गर्दै यो सम्मानित सदनलाई संशोधन गर्दै राजीनामा दिनुपर्थ्यो, तर त्यसो भएको छैन'- नेता दाहालले भन्नुभयाे ।
सय किलाे सुन तस्करी काण्ड गृहमन्त्रीकाे संलग्नताबिना हुन नसक्ने भन्दै उहाँले गृहमन्त्रीले नैतिकता नदेखाएकाे बताउनुभयाे । 'यस्तो गम्भीर घटना गृहमन्त्रीको संलग्नताबिना सम्भव होला र ? त्यसैले यो विषय अब नैतिकताको विषय मात्र रहेन, अब हामीले यसलाई नैतिकताको विषय भनेर उठाउन खोजिरहेका छैनौँ, ३ गते राजीनामा दिएको भए नैतिकताको विषय हुन्थ्यो, अब त यो विषय गृहमन्त्री, अर्थमन्त्री हुँदै विमानस्थल सुरक्षासँग सम्बन्धित सम्पूर्ण सुरक्षा संयन्त्र र भन्सारमा कार्यरत सम्पूर्ण संयन्त्र अनुसन्धानको घेरामा आएको छ, अब त उहाँ अनुसन्धानको घेरामा रहनुपर्छ ।'
साउन ४ गते राजीनामा दिनुपर्ने अवसर भएपनि गृहमन्त्रीले त्याे समय पनि गुजारेकाे बताउनुभयाे । सरकारले नै सुन तस्करलाई सहयोग गरेकोले छानबिन गर्न नसक्ने भन्दै उहाँले सुन तस्करी काण्डको जरैदेखि छानबिन गर्नका लागि उच्चस्तरीय छानबिन समिति बनाउन माग गर्नुभयाे । त्याे समितिमा राष्ट्रिय सभाका सदस्यलाई पनि राख्न उहाँले माग गर्नुभयाे ।
