काठमाडौं । नेकपा एमालेले सुन तस्करी काण्डको टुङ्गो नलगाएसम्म संसद् चल्न नदिने भएको छ ।
सुन तस्करी काण्डमा सरकारको स्पष्ट जवाफ आउनु पर्ने एमालेले माग गरेको छ । प्रधानमन्त्री पुष्पकमल दाहाल प्रचण्डसँग सोमबार एमाले अध्यक्ष केपी शर्मा ओलीले भेटेर सो बारेमा स्पष्ट जवाफ माग्नु भएको थियो । तर प्रधानमन्त्रीले स्पष्ट जवाफ दिन सक्नु भएन ।
सुन तस्करी काण्डमा माओवादीका उपाध्यक्ष कृष्णबहादुर महराको नाम जोडिँदै आएकोमा ठमेलबाट एक व्यवसायी दावा छिरिङ पक्राउ परेपछि माओवादीको थुप्रै नेताहरूको उहाँसँग उठबस भएको फोटाहरू फेला परेका छन् । दावासँग माओवादीका उपमहासचिव वर्षमान पुन, पूर्व उपराष्ट्रपति नन्दबहादुर लगायतका उठबस भएको फोटो र भिडियो सामाजिक सञ्जालमा व्याप्त भएको छ ।
यस अघि एक जना व्यवसायीसँग एमाले अध्यक्ष केपी शर्मा ओली विदेश भ्रमणमा जाने क्रममा सँगै हिँडेको फोटो सार्वजनिक हुँदा सो घटनामा एमालेको संलग्नता भएको भन्दै सामाजिक सञ्जालमा अनावश्यक प्रचार गरिएको थियो ।
अहिले माओवादीका नेताहरूको दावासँग बसेको, तिहारको टीका थापेको, खाएको, घुम्न हिँडेको विभिन्न फोटा र भिडियो सार्वजनिक भएका छन् । यसले सुन तस्करी काण्डमा माओवादी नेताहरूको संलग्नलाई पुष्टि गरेको छ ।
एमाले अध्यक्ष केपी ओलीले प्रधानमन्त्रीसँग सुन प्रकरणको छानबिनका लागि उच्चस्तरीय छानबिन समिति बनाउनु पर्ने माग गर्नुभएको प्रतिनिधि सभामा एमाले संसदीय दलका प्रमुख सचेतक पदम गिरीले जानकारी दिनुभयो । साथै एमालेले घटनाको जिम्मेवारी गृहमन्त्रीले अडान राखेको छ ।
सुन प्रकरणको छिनोफानो नभएसम्म सदन चल्न नसक्ने एमालेले स्पष्ट पारेको छ । आज दिउँसाे १:०० बजेको लागि प्रतिनिधि सभा बैठक बोलाइएको थियो । तर १ः३० बजेसम्म पनि बैठक सुरु हुन सकेको छैन ।
