काठमाडाैं । संसदीय सुनुवाइ समितिले विभिन्न देशका लागि प्रस्तावित राजदूतहरू विरुद्ध परेको उजुरीमाथि छलफल नगर्ने भएकाे छ ।
मंगलबार सिंहदरबारमा बसेको समितिकाे बैठकले विभिन्न ६ मुलुकका लागि प्रस्तावित राजदूतहरू विरुद्ध परेको उजुरीमाथि छलफल नगर्ने निर्णय गरेको हो ।
उजुरी छलफल गर्न नै लायक नभएकाले त्यसमाथि छलफल नगरी संसदीय सुनुवाइ प्रक्रिया अघि बढाउने विषयमा बैठकमा सहमति भएको समितिका ज्येष्ठ सदस्य सभापति ज्ञानेन्द्रबहादुर कार्कीले जानकारी दिनुभयाे । प्रस्तावित राजदूतमाथिका उजुरुबारेको छलफलमा सांसद्हरुले बेनामे र ठेगाना नखुली आएका उजुरीमाथि छलफल आवश्यक नरहेको बताएपछि आगामी बैठकले राजदूतको सुनुवाइ गर्ने निर्णय भएकाे उहाँले बताउनुभयाे ।
राजदूत सिफारिस गर्दा समावेशी नभएको भन्ने विषयमा प्रश्न उठेकाले यस विषयमा आगामी बैठकमा परराष्ट्रमन्त्री एनपी साउदसँग छलफल गर्ने निर्णय भएको कार्कीले बताउनुभयो ।
त्यसअघि बैठकमा समिति सदस्यहरुले पूर्ण विवरण नखोली आएका उजुरीहरुमाथि छलफल गर्न आवश्यक नरहेको बताएका थिए ।
सरकारले गत असार २६ गते लोकबहादुर थापालाई न्यूयोर्कस्थित संयुक्त राष्ट्रका लागि स्थानीय नियोग, रामप्रसाद सुवेदी (स्वीट्जरल्याण्ड), सुधीर भट्टराई (फ्रान्स), घनश्याम लम्साल (कुवेत), तेजबहादुर क्षेत्री (संयुक्त अरब इमिरेट्स) र धनबहादुर वली (थाइल्याण्ड)का लागि राजदूतमा नाम सिफारिस गरी संसदीय सुनुवाइका लागि पठाएको थियो ।
सुनुवाइ समितिबाट नाम अनुमाेदन भएपछि राष्ट्रपति रामचन्द्र पाैडेलले उहाँहरुलाई राजदूत नियुक्त गर्नुहुनेछ ।
