काठमाडाैं । नेपाली कांग्रेसका सांसद् विश्वप्रकाश शर्माले नक्कली सुन तस्करी काण्डबारे प्रधानमन्त्री पुष्पकमल दाहाल प्रचण्ड र गृहमन्त्री नारायणकाजी श्रेष्ठले सदनमा जवाफ दिनुपर्ने बताउनुभएकाे छ ।
शुक्रबार बसेकाे प्रतिनिधि सभाकाे राज्य व्यवस्था तथा सुशासन समितिको बैठकमा बाेल्दै सांसद् शर्माले सदनमा प्रधानमन्त्री र गृहमन्त्रीलाई जवाफ दिने वातावरण बनाउनुपर्ने बताउनुभयाे ।
प्रधानमन्त्री र गृहमन्त्रीको जवाफ सुन्ने अधिकार सिंगो संसद्काे भएकाे भन्दै उहाँले तत्काल सदन सुचार गर्नका लागि समितिले निर्देशन दिनुपर्ने समेत बताउनुभयाे । 'आजको बैठकमा हामी छलफल गर्दै गर्दाखेरी मन्त्री र प्रधानमन्त्रीलाई बोलाउने कुरा गर्दैछौँ, गलत कुरा गरिरहेका छैनौँ, तर मन्त्री र प्रधानमन्त्रीको जवाफ सुन्ने अधिकार यो देशका प्रत्येक सार्वभौम सांसद्ले राख्छन् कि राख्दैनन् ? त्यो अधिकार राख्नुहुन्छ भने संसद्मा त्यो अधिकारको रक्षा गर्ने सन्दर्भमा कसले बोल्ने ? त्यसकारण राज्य व्यवस्था समितिको ध्यान अवरुद्ध भएको संसद् खुल्नुपर्छ भन्नेतर्फ हुनुपर्छ, मन्त्री र प्रधानमन्त्रीहरूले त्यहाँ पनि जवाफ दिनुपर्छ, यहाँ पनि बोलाउने अधिकार छ, बाेलाउनुपर्छ, तर सदनमा जवाफ दिनुपर्छ'- सांसद् शर्माले भन्नुभयाे ।
सरकारकाे कमजाेरीकै कारण त्रिभुवन विमानस्थलबाट ठूलाे परिमाणमा सुन भित्रिएकाे भन्दै उहाँले सुन तस्करीकाे अनुसन्धान गहिराइमा गएर गर्नुपर्ने बताउनुभयाे । सांसद् शर्माले भन्नुभयाे - 'छानबिन गहिराइमा हुनुपर्छ, छानबिन गर्ने कार्य माग गर्नका लागि आवेगसाथ हाेइन, छलफलबाट समाधानमा पुग्नुपर्छ ।'
कांग्रेसकाे हालै सम्पन्न केन्द्रीय कार्यसमिति बैठकले भ्रष्टाचारको कुनै वर्ग, जाति, धर्म, सम्प्रदाय नुहुने भएकाले कुनै मोलाहिजा नराखीकन सरकारले छानबिन गर्नुपर्ने र निर्दोष कोही फस्न नहुने अनि दोषी कोही उम्कन नहुने निर्णय गरेकाे समेत उहाँले बताउनुभयाे । कांग्रेसले नक्कली भुटानी शरणार्थी प्रकरणदेखि सक्कली सुन प्रकरणसम्म छानबिनको लागि माग गरेको पनि सांसद् शर्माले बताउनुभयाे ।
