काठमाडाैं । नेकपा एमालेका सांसद् कृष्णगोपाल श्रेष्ठले सुन तस्करी काण्ड सामान्य विषय नभएकाे बताउनुभएकाे छ ।
शुक्रबार बसेकाे प्रतिनिधि सभाकाे राज्य व्यवस्था तथा सुशासन समितिको बैठकमा बाेल्दै सांसद् श्रेष्ठले सय किलाे यस काण्डमा प्रधानमन्त्री पुष्पकमल दाहाल प्रचण्ड र गृहमन्त्री नरायणकाजी श्रेष्ठकाे संलग्नता छ भनेर जनताले आशंका गरिरहेका बताउनुभयाे । उहाँले भन्नुभयाे - 'नेपाली जनताले भनेकाे छ - यसमा सरकार जिम्मेवार छ, यसमा प्रधानमन्त्रीलाई सबै कुरा थाहा छ, गृहमन्त्री यसमा संलग्न छ, छैन भने कसकाे सेटिङमा याे भयाे त ? नेपाली जनता र अन्तर्राष्ट्रिय जगतलाई जवाफ दिनुपर्छ, त्यसैले याे केस सामान्य केस छैन ।'
प्रधानमन्त्री मातहतकाे राजस्व अनुसन्धान विभागले सुन आउँदैछ भन्ने सूचना १० दिन अगाडि नै पाएका थियाैं भन्नु र पूर्व प्रहरी र सुरक्षा निकायका अधिकारीले गृह मन्त्रालयकाे जानकार बेगर क्विन्टलका क्विन्टल सुन आउन सम्भव नभएकाे बताउनुले पनि प्रधानमन्त्री र गृहमन्त्रीमाथि आशंका उब्जिएकाे सांसद् श्रेष्ठले बताउनुभयाे । उहाँले भन्नुभयाे- 'प्रधानमन्त्री मातहतकाे राजस्व विभाग भन्छ - हामीलाई १० दिन अगाडि नै थाहा थियाे याे आउँदैछ भनेर, १० दिनअघि राजस्वले थाहा पाउँदा सम्माननीय प्रधानमन्त्रीलाई याे कुरा थाहा भएकाे कि भएन ? पूर्व प्रहरी र सुरक्षा निकायका अधिकारीहरुले ठाेकुवासाथ भनिरहेका छन्- क्विन्टलका क्विन्टलका सुन एयरपाेर्टबाट निस्कन गृह मन्त्रालयकाे जानकार बेगर सेटिङ बेगर किमार्थ बाहिर आउन सक्दैन, यसाे हुँदा गृहमन्त्रीलाई पनि थाहा हुने भयाे, यसमा गृहमन्त्री पनि संलग्न भन्ने कुरा आयाे, हाेइन भने काे ? नेपाली जनताले यसकाे जवाफ माग्दैछ ।'
छिमेकी भारतबाहेक तेस्राे मुलुकबाट माेटसाइकलकाे ब्रेकसु आजसम्म आएकाे इतिहास नरहेकाे भन्दै सांसद् श्रेष्ठले सुन राखिएकाे ब्रेकसु हङकङबाट आउनु र त्रिभुवन अन्तर्राष्ट्रिय विमानस्थलकाे भन्सार पास गरेर बाहिरिनुमा ठूलै चलखेल हुन सक्ने आशंका गर्नुभयाे । 'नेपालमा छिमेकी भारत बाहेक तेस्राे मुलुकबाट माेटसाइकलकाे ब्रेकसु आजसम्म आएकाे इतिहास छैन, तर हङकङबाट आयाे, ब्रेकसुभित्र सिधै सुन छिरेर प्लेनबाट सिधैं नेपाल सरकार (त्रिभुवन अन्तर्राष्ट्रिय विमानस्थल) मा ल्याण्डिङ् गर्याे, मूलद्वारबाट सकुशल बाहिर निस्कियाे, अब बिचकाे नेपाल सरकार के हाे त ?'- उहाँकाे प्रश्न छ ।
याे विषयलाई निष्कर्ष र टुंगाेमा पुग्नुपर्ने भन्दै सांसद् श्रेष्ठले याे टुंगाेमा नपुगे आफूहरु पनि निकम्मा हुने बताउनुभयाे । प्रमुख प्रतिपक्षले अविलम्ब सदन चल्नुपर्ने माग राखेपनि सरकार तर्किरहेकाे उहाँले बताउनुभयाे ।
सुन तस्करी काण्डजस्ताे गम्भीर विषय उठ्नु र आफूमाथि पनि प्रश्न उठेपछि राज्य व्यवस्था समितिकाे बैठकमा गृहमन्त्री आउनुपर्नेमा नआउनु गलत भएकाे सांसद् श्रेष्ठले भन्नुभयाे ।
