काठमाडाैं । राष्ट्रिय स्वतन्त्र पार्टी (रास्वपा) का सभापति रवि लामिछानेले सुन तस्करी काण्डकाे अनुसन्धानका लागि शक्तिशाली जाँचबुझ आयाेग आवश्यक रहेकाे बताउनुभएकाे छ ।
शुक्रबार बसेकाे प्रतिनिधि सभाकाे राज्य व्यवस्था तथा सुशासन समितिको बैठकमा बाेल्दै सभापति लामिछानेले सुन तस्करीकाे अनुसन्धानका लागि जाँचबुझ आयोग ऐन अनुसार शक्तिशाली आयोग बनाउन आवश्यक देखिएको बताउनुभयाे ।
यस्ताे जस्तो ठूलो अपराधमा नजरअन्दाज गर्दा प्रमाण लुक्ने, संदिग्ध भाग्ने सम्भावना दिएको हो की भन्ने आशंका पैदा भएको पनि उहाँले बताउनुभयाे । 'प्रमाण लुक्ने सम्भावना, संदिग्धहरु भाग्ने सम्भावना हामीले जानिजानि दिइराखेका छौँ कि ? यति ठूलो काण्डलाई हामीले किन नजरअन्दाज गर्यौँ ? म अनुरोध गर्न चाहाछु, छानबिन अगाडि बढाउनका लागि आजकै बैठकले निर्देशन दिनुपर्यो, जाँचबुझ आयोग ऐनमा यस्ता विषयमा न्यायाधीश, पूर्वन्यायाधीश, प्रधानन्यायाधीश, सीआईबीकाे पनि प्रमुखलाई र विज्ञलाई राखेर एउटा शक्तिशाली जाँचबुझ आयोग बनाउन सक्ने प्रावधान रहेछ, आवश्यकता छ-छैन छलफलका लागि साथीहरुलाई आग्रह गर्न चाहन्छु, तर आवश्यकता छ जस्तो मलाई लाग्छ'- सभापति लामिछानेले भन्नुभयाे ।
प्रधानमन्त्री मातहतकाे राजस्व अनुसन्धान विभाग रहेकाे र त्यसकाे क्षेत्राधिकारले मात्रै नहुने देखिएकाे भन्दै उहाँले आयाेगकाे आवश्यकता रहेकाे बताउनुभयाे ।
यस काण्डकाे अनुसन्धानको दायरा फराकिलो पार्नुपर्ने पनि सभाापति लामिछानेले बताउनुभयाे । यसमा संगठित अपराध, नागरिकता, पासपोर्ट किर्ते, अन्तरदेशीय अपराध लगायत विषय पनि जोडिएकाे भन्दै उहाँले ती विषयमा पनि अनुसन्धान गर्नुपर्ने बताउनुभयाे । 'क्विन्टलका क्विन्टल सुन तस्करी प्रकरणमा प्रधानमन्त्री तथा मन्त्रिपरिषद्को कार्यालय मातहतको राजस्व अनुसन्धानले सुरुवात गर्याे ठिक छ, तर यो विषयलाई यतिमा मात्रै सिमित राख्नुपर्ने अवस्था रहेन, किनभने यसमा संगठित अपराध पनि जोडियो, सम्बन्धित मान्छेले कुन ढंगले, कसरी पासपोर्ट र नागरिकता प्राप्त गरेको भन्ने विषय पनि आयो, अन्तरदेशिय अपराध पनि यहाँ देखियो, मिलेमतो, संरक्षण जस्ता कयौँ कसुरहरु यसमा देखिए, अनुसन्धान गर्न कसले गर्ने ? के कारणले यत्रो दिनसम्म रोकियो ? यो गम्भीर विषय भयो'- सभापति लामिछानेले भन्नुभयाे ।
सुन काण्ड बाहिरिएकाे लामाे समयपछि आज मात्रै सीआईबीले अनुसन्धानकाे अधिकार पायाे भन्ने आफूले सुनेकाे भन्दै सभापति लामिछानेले यस विषयमा गम्भीर हुनुपर्ने बताउनुभयाे । सुन तस्करी काण्डमा सत्तापक्षका सांसद्काे पनि नाम जाेडिएकाे भन्दै उहाँले यसलाई गहिराइमा पुगेर अनुसन्धान गरेर टुंगाेमा पुर्याउनुपर्ने बताउनुभयाे ।
