काठमाडाैं । प्रमुख प्रतिपक्षी नेकपा एमालेले राष्ट्रिय सभा बैठकमा अवराेध कायमै राखेकाे छ ।
सुन तस्करी काण्डलाई लिएर एमालेले साेमबार बसेकाे राष्ट्रिय सभा बैठक अवराेध गरेकाे हाे । आजकाे बैठक सुरु हुनासाथ एमाले सांसद्ले उठेर विराेध जनाएका थिए ।
त्यसपछि राष्ट्रिय सभा अध्यक्ष गणेशप्रसाद तिमिल्सिनाले एमाले सांसद् दिलकुमारी रावल पार्वतीलाई बाेल्न समय दिनुभयाे ।
सांसद् रावलले सुन तस्करी काण्डमा सरकार गम्भीर नभएकाे बताउनुभयाे । सरकारकाे संलग्नताबिना क्विन्टलका क्विन्टल सुन तस्करी हुन नसक्ने भन्दै उहाँले सुन तस्करी काण्डमा सरकारकाे प्रत्यक्ष संलग्नता देखिएकाे बताउनुभयाे ।
यस काण्डकाे निष्पक्ष छानबिनका लागि उच्चस्तरीय छानबिन समिति आवश्यक रहेकाे भन्दै सांसद् रावलले त्यस्ताे समिति नबन्दासम्म सदन अघि बढ्न नसक्ने बताउनुभयाे । सरकारले गरिरहेको छानबिन मुख्य दोषीसम्म नपुग्ने भन्दै उहाँले उच्चस्तरीय छानबिन समिति नबनेसम्म एमालेले सदन चल्न नदिने चेतावनी दिनुभयाे । यस काण्डले नेपालकाे सुरक्षा उदांगाे भएकाे पनि सांसद् रावलले बताउनुभयाे ।
