काठमाडाैं । नेकपा एमालेका सांसद् रघुजी पन्तले सुन तस्करी काण्डकाे अनुसन्धानका लागि उच्चस्तरीय छानबिन समिति गठन गर्नैपर्ने बताउनुभएकाे छ ।
सोमबार नयाँ बानेश्वरस्थित संघीय संसद् भवन परिसरमा सञ्चारकर्मीसँग कुरा गर्दै सांसद् पन्तले सुन तस्करी काण्डमा निष्पक्ष छानबिन हुनेमा आशंका रहेकाले समिति गठन गर्नैपर्ने बताउनुभयाे ।
सुन तस्करी काण्डमा मुछिएका नेताहरुलाई चाेख्याउने प्रयास भइरहेकाे बताउँदै उहाँले भन्नुभयाे - 'यसमा राजनीतिक मान्छेहरु संलग्न छन्, कुन-कुन पार्टीका छन् भन्ने त नाम नै आएको छ बाहिर, उनीहरुलाई चोख्याउने काम भएको छ ।'
यस काण्डमा प्रधानमन्त्री पुष्पकमल दाहाल प्रचण्डकाे कामप्रति ढुक्क हुने अवस्था नभएको बताउँदै सांसद् पन्तले बताउनुभयाे । उहाँले भन्नुभयाे - 'सरकारको नेतृत्व गर्ने मान्छेमाथि नै विश्वास छैन हामीलाई, प्रचण्डजीले जतिसुकै ठुलो कुरा गरेपनि उहाँको कामले ढुक्क हुने अवस्था त छैन, राजस्वले राम्रै छानविन गरेको थियाे, सीआईबीलाई दिने निर्णय भयो, त्यो पनि ठिकै छ, एउटा उच्चस्तरीय छानबिन समिति बनाए भयो नि त, राजस्व र प्रहरीकाे छानबिन पनि जारी रहन्छ ।'
सुन लगायत अन्य तस्करी अन्त्यका लागि विशेष नीतिगत निर्णय गर्न पनि उच्चस्तरीय छानबिन समिति आवश्यक रहेकाे उहाँले बताउनुभयाे । 'सुन तस्करी सदाका लागि हाम्रो एयरपोर्टबाट तस्करी हुन कसरी रोक्ने भन्ने कुराको लागि पनि त छानबिन समिति बनाउँदा के बिग्रिन्छ र ? नेपालको एयरपोर्टबाट सुन तस्करी सदाको लागि अन्त्य होस् भन्नका लागि राजनीतिक रुपमा कडा कदम नचालेसम्म यो रोकिँदैन'- सांसद् पन्तले भन्नुभयाे ।
उहाँले लुम्बिनी विकास काेषकाे उपाध्यक्षमा ल्यारक्याल लामालाई नियुक्त गरेर सरकारले आफ्नाे असली चरित्र देखाएकाे बताउनुभयाे । लामाकाे नियुक्तिले आफूलाई लाज लागेकाे समेत सांसद् पन्तले बताउनुभयाे । करोडौँ रुपैयाँको चलखेलमा लुम्बिनी विकास कोषको उपाध्यक्षमा लामा नियुक्त भएकाे हुन सक्ने आशंका गर्दै उहाँले सरकारले अब भ्रष्टाचार नियन्त्रणका गफ नलगाए हुने बताउनुभयाे ।
