काठमाडाैं । नेकपा एमालेका सांसद् याेगेश भट्टराईले सुन तस्करी काण्डमा सत्तापक्षकै सांसद्काे नाम आउँदा पनि छानबिन अगाडि नबढाइएकाे भन्दै आपत्ति जनाउनुभएकाे छ ।
मंगलबार बसेकाे प्रतिनिधि सभा बैठककाे सुरुमै बाेल्दै सांसद् भट्टराईले सुन तस्करी काण्डमा प्रधानमन्त्री पुष्पकमल दाहाल प्रचण्ड, गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतमाथि पनि आंशका उत्पन्न भएकाे बताउनुभयाे । क्विन्टलका क्विन्टल सुन तस्करीमा प्रधानमन्त्री, गृहमन्त्री र अर्थमन्त्रीमाथि पनि छानबिन हुनुपर्ने बताउनुभयाे ।
सरकारकै मान्छे संलग्न भएकाले सरकारकै अंगले निष्पक्ष छानबिनमा आशंका देखिएकाले एमालेले उच्चस्तरीय छानबिन समितिकाे गरेकाे भन्दै गृहमन्त्रीको छनबिन कसले गर्छ ? भन्ने प्रश्न गर्नुभयाे । 'म गृहमन्त्रीजीलाई भन्न चाहन्छु, तपाइँको पोलिटिकल कमिसार को छ ? फिल्ड कमिसार को छ ? तपाइँको आदेश फिल्ड कमिसारले मानेको छैन कि सूचना भेरिफाइ गर्नुभएको छैन ? गृहमन्त्रीजीसँग पनि बयान कसले लिन्छ ? सीआईबीले लिन्छ ? राजस्व अनुसन्धानले लिन्छ ? अर्थमन्त्री र प्रधानमन्त्री कार्यालयमाथि पनि हाम्रो प्रश्न छ, राष्ट्रिय अनुसन्धान विभागमाथि हाम्रो प्रश्न छ, यत्रा निकाय विमानस्थलमा सुन तस्करी हुँदा कहाँ सुतेका थिए ?'- सांसद् भट्टराईकाे प्रश्न छ ।
तीन महिनाअघि भेपमा नौ किलो सुन तस्करीमा सत्तापक्षको नेता संलग्न रहेको प्रतिवेदन सीआईबीले दिँदा समेत गृहमन्त्रीले त्याे अगाडि नबढाउनु आपत्तिजनक रहेकाे बताउनुभयाे ।
