काठमाडौं । प्रतिनिधि सभा सदस्य योगेशकुमार भट्टराईले सुन तस्करी घटनामा गृह मन्त्री र अर्थमन्त्री माथि पनि छानबिन गर्नुपर्ने बताउनुभएको छ ।
मंगलबार प्रतिनिधि सभा बैठकमा बोल्दै बस्नेतले त्रिभुवन अन्तर्राष्ट्रिय विमानस्थलबाट २२÷२३ पटक सुन तस्करी भएको समाचार आइरहेको बताउनुभयो । इलेक्ट्रिक सिगरेटमा सुन तस्करी हुँदा माओवादी पार्टीका जिम्मेवार नेता संलग्न भएको प्रहरी अनुसन्धानबाट खुलेको भए पनि त्यस माथि अनुसन्धान नभएको उहाँले बताउनुभयो ।
सुन तस्करीमा गृह मन्त्री र अर्थ मन्त्रीमाथि नै छानबिन गर्नुपर्ने भएकाले उच्चस्तरीय छानबिन समिति गठन गर्नु पर्ने उहाँले बताउनुभयो । उच्चस्तरीय छानबिन समिति गठन गर्ने विषमा संसदीय समितिमा सर्वसहमति भएको उहाँले स्मरण गराउनुभयो ।
सो प्रकरणमा गृह मन्त्रीकै बयान लिनु पर्ने भएको उच्च स्तरीय समिति नबनाउने हो भने कसले बयान लिन्छ ? भदै उहाँले प्रश्न गर्नुभयो ‘गृहमन्त्रीसँग कसले बयान कसले लिन्छ, सीआईबीले लिन्छ, राजस्व अनुसन्धानले लिन्छ ?’, उहाँले प्रश्न गर्नुभयो ।
सुन तस्करको देश भनेर नेपालको अन्ताराष्ट्रिय छवि बनेको भट्टराईले बताउनुभयो । ‘अन्तराष्ट्रिय छवि माथि पनि गम्भीर प्रश्न उठेको छ’, उहाँले भन्नुभयो ।
उहाँले गृह मन्त्री, अर्थ मन्त्री, प्रहरी र राजश्व अनुसन्धान विभाग नै अनुसन्धानको दायरामा रहेकाले उहाँहरू माथि छानबिन गर्न उच्च स्तरीय समिति आवश्यक रहेको उहाँले बताउनुभयो । ‘अर्थमन्त्रीसँग हाम्रो प्रश्न छ, प्रधानमन्त्री कार्यालयसँग हाम्रो प्रश्न छ, सीबीआईसँग हाम्रो प्रश्न छ, राष्ट्रिय अनुसन्धान विभागसँग हाम्रो प्रश्न छ, यत्रा निकाय त्रिभुवन अन्तर्राष्ट्रिय विमानस्थलमा हुँदा यी निकाय कहाँ सुतेका थिए, यिनीहरूमाथि प्रश्न कसले उठाउँछ ? सीआईबीले उठायो ? राजस्व अनुसन्धानले उठाउँछ ? भन्सार विभागले उठायो ? अध्यागमन कहाँ छ ? एयरपोर्ट म्यानेजमेन्ट कहाँ छ ? यी तमाम विषयको छानबिन नगरीकन यो फ्याक्ट फाइन्डिङ हुन सक्दैन’, उहाँले भन्नुभयो ।
भट्टराईले उच्चस्तरीय छानबिन समिति बनाउन आवश्यक छ कि छैन भनेर प्रतिनिधि सभामा मतदानमा जान उहाँले चुनौती दिनुभयो । कुनै पनि सांसदलाई ह्विप नलगाई सो विषयमा मतदानमा जान उहाँले आग्रह गर्नुभयो ‘यदि संसद्ले छानबिन समिति बनाउनु हुन्न भनेर भन्छ भने एमालेको आन्दोलन त्यही दिनदेखि स्थगित हुन्छ’, उहाँले भन्नुभयो ।
