काठमाडौं । उपप्रधानमन्त्री एवं गृह मन्त्री नारायणकाजी श्रेष्ठले सुन तस्करी प्रकरणले नेपालको मात्र नभएर छिमेकी मुलुकको अर्थतन्त्रमा समेत नकारात्मक असर पारेको बताउनुभएको छ ।
मंगलबार प्रतिनिधि सभा बैठकमा बोल्दै श्रेष्ठले सुन तस्करी प्रकरणले देशको समग्र क्षेत्रमा असर गरेको बताउनुभयो । सुन तस्करी घटनाको छानबिनलाई अन्तिम निष्कर्षमा पुर्याएर दोषीलाई कारबाहीको दायरमा ल्याउनु अहिलेको सरकारको प्रमुख कार्यभार भएको उहाँले बताउनुभयो ।
यस्ता घटना रोक्न विमानस्थलको संरचनामा व्यापक परिवर्तन गर्न आवश्यक रहेको पनि उहाँले बताउनुभयो । यस प्रकारको घटना पुनरावृत्ति हुन नदिन विमानस्थलको सुरक्षा र व्यवस्थापनलाई परिवर्तन गरी कडा पार्नुपर्नेमा उहाँले जोड दिनुभयो ।
नेपाललाई ट्रान्जिट बनाएर सुन तस्करी गर्ने काम भएको श्रेष्ठले बताउनुभयो । ‘सुनको तस्करीको दोषीलाई हर हालतमा कानुनको दायरामा ल्याउने काम गर्नै पर्छ’, उहाँले भन्नुभयो ।
बैठकमा बोल्दै श्रेष्ठले सुन तस्करीको यो घटना संगठित अपराधको घटना भएको बताउनुभयो । त्यसैले सो घटना राजश्व अनुसन्धानले मात्र अनुसन्धान गर्ने घटना होइन भनेर सीआईबीलाई केस ह्याण्डल गर्न दिएको श्रेष्ठले बताउनुभयो ।
सुन तस्करीको घटनाले देशको छविमा आँच पुगेको श्रेष्ठले बताउनुभयो । ‘यसले हाम्रो देशका प्रतिष्ठा र छविमा सारै नकारात्मक प्रभाव पारेको छ, यसले हाम्रो राजश्वमा नकारात्मक असार पुर्याएको छ, यसले हाम्रो अर्थतन्त्रमा समस्या पारेको छ’ उहाँले भन्नुभयो ।
सो घटनाले राष्ट्रिय सुरक्षा माथि नै प्रश्न उठाएको श्रेष्ठले बताउनुभयो । ‘यसले संगठित अपराधको जालोलाई बढाउने काम गरेको छ, यसले राष्ट्रिय सुरक्षाको संवेदनशीलतालाई ध्यानाकर्षण गराएको छ’, उहाँले भन्नुभयो ।
३३ किलो सुन बाटोमै छिनेर मानिसको हत्यासम्म गरेको कारण १ सय किलो सुन मालिकसम्म पुग्न नदिई बाटोबाटै पक्रनु परेको उहाँले बताउनुभयो ।
सुन तस्करीमा यस अघि बनाएको संसदीय समिति, सरकारले बनाएको समितिले केही पनि काम गर्न नसकेकोले राज्यका निकायलाई काम गर्न दिनु राम्रो हुने उहाँले बताउनुभयो । राजश्व अनुसन्धान र सीआईबीलाईले गरेको अनुसन्धानमा चित्त नबुझे त्यस पछि उच्च स्तरीय आयोग बनाउने विषयमा छलफल गर्न राम्रो हुने उहाँले बताउनुभयो ।
उहाँले राज्यका मूलभूत मान्यतालाई अंगीकार गर्न कानुनले गरेको व्यवस्थालाई विश्वास गर्न उहाँले आग्रह गर्नुभयो । श्रेष्ठले अनुसन्धानको प्रक्रियालाई असहयोग नगर्न पनि आग्रह गर्नुभयो ।
