काठमाडौं । राष्ट्रिय सभा सदस्य भगवती न्यौपानेले नेकपा एमालेले सदनमा शालीनतापूर्वक विरोध प्रदर्शन गरेको बताउनुभएको छ ।
शुक्रबार राष्ट्रिय सभा बैठकमा बोल्दै न्यौपानेले विगतमा जस्तो एमालेले सदनमा ब्रिफकेस खोस्ने र कुर्सी हान्ने काम नगरेको बताउनुभयो । हामीले उठाएका मुद्दाहरू जेन्युन छन्, हामीले उठाएका विषयहरू जेन्युन छन्’, उहाँले भन्नुभयो ।
सत्ता पक्षले देशका विरुद्ध धावा बोल्दा, संविधानलाई बचाउँछौँ भन्दै संविधानलाई च्यात्दा र कानुन माथि धावा बोल्दा संसद्मा एमालेले विरोध जनाएको उहाँले बताउनुभयो । ‘हामीलाई बाध्य बनाइएको छ, हाम्रा आवाजलाई जब बेवास्ता गरिन्छ, अनि हामीलाई बाध्य गराइन्छ सदन अवरुद्ध गर्न’, उहाँले भन्नुभयो ।
देशलाई तस्करीको अखडा बनाउनबाट मुक्त गर्नुपर्छ भनेर एमालेले भनेको कुरा सुनुवाइ नभएपछि अहिले संसद् अवरुद्ध गर्नु परेको उहाँले बताउनुभयो । सुन तस्करी काण्डमा सरकारका मन्त्री संलग्न भएको कुरा तथ्यले पुष्टि गरिसकेको उहाँको भनाइ छ । त्यसैले उच्च स्तरीय छानबिन समिति गठन गर्न एमालेले माग गरेको र त्यसको सुनुवाइ नहुँदा संसद् अवरुद्ध गर्नु परेको उहाँले प्रष्ट पार्नुभयो । ‘सदन हामीले रहरका निम्ति अवरुद्ध गरिरहेका छैनौँ, यो बाध्यता हो’, उहाँले भन्नुभयो ।
राज्यको निकायलाई अविश्वास मात्रै गरेको नभई राज्यका निकासँग आफूहरूको प्रश्न रहेको उहाँले बताउनुभयो । राज्यका निकाय माथि नै प्रश्न उठेपछि उहाँहरूको बयान लिने निकाय आवश्यक रहेको उहाँले प्रष्ट पार्नुभयो । तर त्यसमा सरकार जिम्मेवार नभएको उहाँले बताउनुभयो । प्रतिपक्षले यस विषयमा प्रश्न उठाउँदा सरकारले प्रतिपक्ष माथि नै प्रश्न उठाउने गरेको उहाँले प्रष्ट पार्नुभयो ।
डेङ्गु नियन्त्रण गर्न, लम्पि स्किन नियन्त्रण गर्न, बाढी पीडितलाई उद्धार र राहत वितरण गर्न सरकारलाई सदन अवरुद्ध भए पनि के ले कोरोको छ ? भन्दै उहाँले प्रश्न गर्नुभयो । सरकार देश र जनता प्रति उत्तरदायी नभएको उहाँले बताउनुभयो ।
