काठमाडौं । प्रतिनिधि सभाको सोमबारको बैठकमा नेपाली कांग्रेसका सांसद् सुनिल शर्माले बोलेको विषयलाई लिएर माओवादीका मुख्य सचेतक हितराज पाण्डेले नियमापत्ति जनाउनुभएको विषय नियमापत्ति भन्दा पनि प्रतिवाद देखिएको सभामुखले बताउनुभएको छ ।
अहिलेको सरकारले आतंककारीको प्रतिनिधित्व गर्छ कि डेमोक्रयाटको भन्दै शर्माले प्रश्न उठाउनुभएको थियो । उहाँले सरकारलाई आतंककारी भनेको भन्दै नियमापत्ति जनाउनुभएको थियो । त्यसमा माओवादीले नियमापत्ति गरेको थियो । तर सभामुखले पाण्डेले उठाएको विषय नियमापत्ति नभई प्रतिवाद भएकोले उहाँलाई बोल्न रोक्दै बस्न आग्रह गर्नुभयो ।
संविधान अनुसार बैठक चलिरहेको बेला प्रधानमन्त्रीलाई आतंककारी भनिएको भन्दै उहाँले विरोध जनाउनुभएको थियो । प्रधानमन्त्रीलाई आतंककारी भन्ने शर्मालाई कारबाही गर्नुपर्ने र बोलेको कुरा रेकर्डबाट हटाउनु पर्ने पाण्डेको माग थियो ।
पाण्डेले शर्मालाई कारबाही गर्नुपर्ने कुरा गरेपछि सभामुखले रोक्नु भएको थियो । ‘यहाँको नियमापत्ति होइन, आएका कुरामा प्रतिवाद देखियो त्यसो भएकोले माननीय सदस्य बस्नुस्’, सभामुखले भन्नुभयो ।
सभामुखको आग्रह पछि पाण्डे बस्नु भएको थियो ।
