काठमाडाैं । सर्वाेच्च अदालतका प्रस्तावित प्रधानन्यायाधीश विश्वम्भरप्रसाद श्रेष्ठको संसदीय सुनुवाइ भाेलि हुने भएकाे छ ।
सिंहदरबारमा आइतबार बसेकाे संसदीय सुनुवाइ समितिको बैठकले प्रस्तावित प्रधानन्यायाधीश श्रेष्ठकाे सुनुवाइ साेमबार गर्ने निर्णय गरेको हो ।
उहाँविरुद्ध तीन वटा उजुरी परेका छन् । समितिले प्रस्तावित प्रधानन्यायाधीश श्रेष्ठ विरुद्ध कुनै उजुरी भए १० दिनभित्र दिन साउन २४ गते सार्वजनिक उजुरी आह्वान गरेकामा तीन वटा मात्र उजुरी परेको हाे ।
समितिको सोमबार बस्ने बैठकको सुरुमै उजुरीकर्तासँग जानकारी लिएपछि प्रस्तावित प्रधानन्यायाधीशको संसदीय सुनुवाइ सुरु हुनेछ । यसअघि बैठकमा परेका उजुरीबारे जानकारी दिन सदस्यहरूलाई त्यससम्बन्धी कागजात वितरण गरिएको थियो ।
संसदीय सुनुवाइका क्रममा उहाँले आफ्नो योग्यता, अनुभव, कार्ययोजना र अवधारणा प्रस्तुत गर्नुहुनेछ । संसदीय समितिले सबै विषयवस्तुबारे जानकारी लिएपछि श्रेष्ठको नाम अनुमोदन गर्ने वा नगर्ने भनी निर्णय गर्नेछ ।
संसदीय समितिबाट नाम अनुमाेदन भएपछि श्रेष्ठलाई राष्ट्रपति रामचन्द्र पाैडेलले प्रधानन्यायाधीशमा नियुक्त गर्नुहुनेछ ।
साउन १८ गते बसेको संवैधानिक परिषद्काे बैठकले सर्वोच्च अदालतका वरिष्ठतम् न्यायाधीश श्रेष्ठलाई प्रधानन्यायाधीश नियुक्तिका लागि सिफारिस गरेको थियो । श्रेष्ठले अहिले सर्वाेच्चमा कायमुकायम प्रधानन्यायाधीशकाे जिम्मेवारी सम्हालिरहनुभएकाे छ ।
समितिले संसदीय सुनुवाइ प्रक्रिया पूरा गरी नाम अनुमोदन गरेपछि राष्ट्रपतिबाट प्रधानन्यायाधीश नियुक्त हुने संवैधानिक व्यवस्था छ ।
