काठमाडाैं । कोशी प्रदेश सभा नेकपा एमालेका प्रमुख सचेतक रेवतीरमण भण्डारीले मुख्यमन्त्री उद्धव थापाले राखेको विश्वासको मतसम्बन्धी प्रस्ताव माथिको छलफलमा बोल्दै उपसभामुखले संविधान र कानुनअनुसार अध्यक्ष मण्डलका सदस्यलाई जिम्मेवारी दिएर उपचारका लागि अस्पताल गएको बताउनुभएकाे छ ।
सत्तारुढ दलले उपसभामुखले नाटक मञ्चन गरेको भन्दै गरेको टिप्पणीप्रति प्रतिक्रिया दिँदै प्रश्न गर्नुभयाे- ‘सभामुखलाई खुलेआम हस्ताक्षर गर्न लगाएर सरकार बनाउनेहरुले गरेको चाहिँ नाटक मञ्चन थियो कि आज हो ? एमालेले एकैछिनमा बिरामी बनाउने र एकैछिनमा निको बनाउने काम गर्दैन ।’
सर्वोच्च अदालतले सभामुखको समर्थनमा बनेको सरकारलाई बर्खास्त गरेको बताउँदै उहाँले अदालतले बर्खास्त गरेको सरकारले मुख्यमन्त्री कार्यालयमा ताला लगाएर ६ दिनसम्म सरकारबिहीनताको अवस्था सिर्जना गरेको बताउनुभयाे ।
उहाँले ४७ जना सांसदको समर्थन देखाए ताली पड्काएर मुख्यमन्त्रीलाई बधाई दिने एमाले तयार रहेकाे समेत बताउनुभयाे ।
