काठमाडौं । प्रतिनिधि सभा सदस्य योगेश भट्टराईले सत्ता पक्षकै अवरोध र होहल्लाको कारण प्रतिनिधि सभा बैठक चल्न नसकेको बताउनुभएको छ ।
बुधबार प्रतिनिधि सभा बैठकमा बोल्दै भट्टराईले एमालले संसद् अवरुद्ध गरेको भनि बाहिर गलत प्रचार गरिएको भन्दै उहाँले आलोचना गर्नुभयो । तत्कालीन राजा महेन्द्रले संसद् विगठन गर्दा जम्मा चार सिट रहेको कम्युनिष्ट पार्टीले संसद् पुनर्स्थापनाको माग गरेको उहाँले स्मरण गराउनुभयो । ‘यो संसद् सत्ता पक्षलाई चाहिन्छ कि चाहिँदैन, तर नेकपा एमालेलाई चाहिन्छ’, उहाँले भन्नुभयो ।
एमालेलाई आफ्ना आवाज उठाउन नदिएको कारण संसद् बैठक अवरुद्ध भएको उहाँले प्रष्ट पार्नुभयो । तर शीर्ष नेताहरूले पहल लिएर सुझबुझपूर्ण ढङ्गले संसद्को गरिमा जोगाएको भन्दै उहाँले धन्यवाद दिनुभयो ।
एमालेले सुरुकै दिनबाट सुन तस्करीको विषयमा उच्चस्तरीय छानबिन समिति बनाउन आग्रह गरेको उहाँले स्मरण गराउनुभयो । यस बिचमा सीआईबी र एमालेको बिचमा अविश्वास पैदा गराउने काम गरेको भन्दै उहाँले आपत्ति जनाउनुभयो ।
सीआईबीको गाडी अनुसन्धानको लागि ठिक ठाउँमा पुगेपछि त्यसलाई मोड्ने गरिएको उहाँले बताउनुभयो । अनुसन्धानको क्रममा उच्च पदस्थ नेताको नामा आउने बित्तिकै सिआईबीको गाडीमा ब्रेक लाग्ने गरेको उहाँले बताउनुभयो । सीआईबीलाई स्वतन्त्रतापूर्वक काम गर्न दिइएन, उस प्रति हामीले अविश्वास गरेको होइन’, उहाँले भन्नुभयो ।
सीआईबीलाई राजनीतिक दबाबमा छानबिन गर्न अवरोध गरिएकोले एमालेले स्वतन्त्र छानबिन समिति बनाउन माग गरेको उहाँले बताउनुभयो । आज जे सहमति भयो, एमालेले साउन १० गते त्यही कुरा भनेको उहाँले प्रष्ट पार्नुभयो । सोही दिन यो काम भएको भए यस्तो अवस्था आउँदै नआउने उहाँले बताउनुभयो ।
भट्टराईले कोशी प्रदेशमा सरकार टिकाउन फेरी संविधान माथिको ठाडो हस्तक्षेप भएको बताउनुभयो । उहाँले कोशीमा भएका गतिविधिको निन्दा गर्नुभयो । भट्टराईले सो विषयमा सबैको ध्यानाकर्षण गराउनुभयो ।
