काठमाडाैं । नेकपा एमालेका सांसद् गाेकुलप्रसाद बाँस्काेटाले मूलधारका मिडियाका सम्पादकसँगको छलफलमा प्रधानमन्त्री पुष्पकमल दाहाल प्रचण्डले दिएको अभिव्यक्तिप्रति आपत्ति जनाउनुभएकाे छ ।
बुधबार बसेकाे प्रतिनिधि सभा बैठकमा बाेल्दै सांसद् बाँस्काेटाले मूलधारका मिडियाका सम्पादकसँगको छलफलमा प्रधानमन्त्री प्रचण्डले दिएको अभिव्यक्तिप्रति आपत्ति जनाउँदै उहाँले देश कहाँबाट चलेको छ भन्दै प्रश्न गर्नुभयाे ।
सांसद् बाँस्काेटाले भन्नुभयाे - 'एउटा अनौठो कुरा देखियो, १२ भाइ हो कि १७ भाइ हो मूलधारे मिडियाका सम्पादकहरुसित प्रधानमन्त्रीले एउटा मिटिङ गरेको सुनियो र उहाँहरुले नै जानकारी गराएअनुसार - खाेइ के भइरहेको छ, कसले गरिरहेको छ, कहाँबाट प्ले भइरहेको छ मलाई थाहा छैन, भन्ने प्रधानमन्त्रीको भनाइ हो मिडियाबाट उदृत भएको, तर म सोध्न चाहन्छु - देशको कार्यकारी को ? त्यसाे भन्न मिल्छ कि मिल्दैन ? यो जवाफ दिनुपर्ने विषय हाे कि हाेइन ? कहाँबाट चल्या छ त त्यसो भए ? कुन शक्ति केन्द्रले कुन रिमोटबाट देश चलाएको छ ? त्यसको जवाफ चाहियो नि, यत्तिकै जे पनि भन्दिने ।'
केही दिन अघि सम्पादकहरुसँग भएकाे छलफलमा प्रधानमन्त्री प्रचण्डले कतिपय निर्णय सरकारकै अंगबाट भए पनि आफू लाचार वा अनविज्ञ हुने गरेको र कतिपय निर्णयहरु कहाँबाट भइरहेका छन् भनेर आफैं अन्यौलमा रहेको बताउनुभएकाे कुरा बाहिर आएकाे थियाे ।
