काठमाडौं । नेकपा एमालेका अध्यक्ष केपी शर्मा ओलीले झापाको गिरिबन्धु टी स्टेटको जग्गाका विषयमा छानबिन गर्न जरुरी नभएको बताउनुभएकाे छ ।
बुधबार संघीय संसद् भवन नयाँ बानेश्वरमा सञ्चारकर्मीसँग कुरा गर्दै अध्यक्ष ओलीले गिरीबन्धु टी स्टेटको करिब २८० बिगाहा जग्गा सट्टापट्टा गर्ने तत्कालीन सरकारको निर्णयका विषयमा छानबिन गर्न जरुरी नभएको बताउनुभयाे । तर सरकारलाई मन लागे छानबिन गर्न सक्ने समेत उहाँले बताउनुभयाे ।
बिना कानुन जग्गा सट्टापट्टा गर्ने गरिएपछि आफू नेतृत्वको सरकारले कानुन बनाएर काम गरेकाेअ अध्यक्ष ओलीले बताउनुभयाे । चिया बगानमा कुनै अनियमितता नभएको बताउँदै उहाँले भन्नुभयाे - 'कसरी अनियमितता ? बिनाकारण जग्गा दिएको होइन, सट्टापट्टाको कानुन बनाइ दिएका छौँ, अरू केही होइन, सरकारले छानविन गर्न मन लागे गरे हुने उनले प्रतिक्रिया दिए ।
एकीकृत समाजवादीका प्रमुख सचेतक मेटमणि चौधरीकाे आफूलक्षित भनाइमा अध्यक्ष ओलीले स्तरहीन मान्छेहरुले सुन तस्करी प्रकरणमा आफूलाई जोड्ने प्रयास गरेको बताउनुभयाे । चौधरीले साेमबार सुन तस्करीमा ओली पनि संलग्न भएको दाबी गर्दै एक वर्षभित्र पक्राउ पर्ने ठोकुवा गर्नुभएकाे थियाे ।
अध्यक्ष ओलीले लचिलो भएर सदन खुलाउन तयार भएकोमा सरकारलाई धन्यवाद दिनुभयाे । सुन तस्करी सधैंका लागि अन्त्य गर्न र निष्पक्ष छानबिन गर्न सरकार तयार नभएकै कारण लामो समय सदन अवरुद्ध भएकाले एमालेले पनि सम्झौता गर्नुपरेको अध्यक्ष ओलीले प्रष्ट पार्नुभयाे ।
झापाको विर्तामोडस्थित टी स्टेटको जग्गामा भ्रष्टाचार भइरहेकाे भन्दै विराेध भइरहेकाे छ ।
