काठमाडौं । नेपाली कांग्रेसका सांसद् प्रदीप पौडेलले सरकारले भ्रष्टाचारका काण्डमा आफ्ना व्यक्तिलाई जोगाउन खाेजेकाे बताउनुभएकाे छ ।
बुधबार बसेकाे प्रतिनिधि सभा बैठकमा बाेल्दै सांसद् पाैडेलले भ्रष्टाचारका काण्डमा सरकारले छानीछानी दण्डित गराउन र जाेगाउन लागिपरेकाे बताउनुभयाे ।
एक क्विन्टल र इलेक्ट्रिक सिगरेट लगायत सुन काण्डकाे छानबिनका लागि उच्चस्तरीय छानबिन आयाेग बनाउने सहमति भएकाे भन्दै उहाँले भ्रष्टाचारका सबै काण्डकाे छानबिनका लागि पनि छानबिन आयाेग बन्नुपर्ने बताउनुभयाे ।
भ्रष्टाचारकाे सम्बन्धमा असाध्यै निर्मम छाैं र भ्रष्टाचारका खाेलिएका फाइललाई टुंगाेमा पुर्याउँछाैं भनेपनि त्यस अनुसार काम नगरेकाे सांसद् पाैडेलले बताउनुभयाे । अहिलेसम्म भएका भ्रष्टाचारका सबै काण्ड छानबिन गर्ने आयोग गठन गर्न उहाँले सरकारकाे ध्यानाकर्षण गराउनुभयाे । 'सबै घटनाको छानबिन गर्छौं भनेर सरकारले भन्यो, तर भने जस्तो गरिरहेको छैन, भ्रष्टाचारको घटनाहरु पनि आफूलाई चाहिएकाे मात्रै रोज्ने, छनाेट गर्ने, त्यो घटनाभित्र परेको मानिस जजसलाई दण्डित गर्नुपर्ने हो त्यसलाई गर्ने र जसलाई जोगाउनुपर्ने हाे जोगाउने ढंगबाट सरकार अगाडि बढेको छ'- सांसद् पाैडेलले भन्नुभयाे ।
भ्रष्टाचारको काण्ड छनोट गरेर छानबिन गर्ने प्रवृत्ति अन्त्य गर्नुपर्ने उहाँले बताउनुभयाे । 'त्यसैले हामी आग्रह गर्छाैं - भ्रष्टाचारका कुनै पनि काण्ड छनाेट गरेर छानबिन गर्ने हाेइन, भएजतिका सबै काण्डकाे छानबिन गरिनुपर्छ, कुनै पनि काण्ड बाँकी राख्नुहुँदैन, त्यसैले म प्रमुख प्रतिपक्ष, प्रतिपक्ष, सत्तारुढ दल सबैलाई आग्रह गर्छु, कुनकुन घटनाकाे छानबिन गर्ने हाे त्यसकाे बारेमा एउटा छानबिन आयाेग बनाऔं, कसरी छानबिन गर्ने हाे नियम बनाऔं, सुन काण्डमा एउटा मात्रै विषय हाेइन, नेपालमा भएका सबै भ्रष्टाचारजन्य घटनाकाे छानबिनका लगि एउटा छानबिन आायाेग बनाउनुपर्छ, '-सांसद् पाैडेलले भन्नुभयाे ।
