काठमाडौं । प्रतिनिधि सभा सदस्य दीपकबहादुर सिंहले कान्ति लोक पथको परियोजना हटाएर अन्त बजेट लैजान लागेको भन्दै आपत्ति जनाउनुभएको छ ।
बिहीबार प्रतिनिधि सभा बैठकको विशेष समयमा बोल्दै सिंहले तराइबाट काठमाडौं छिर्ने वैकल्पिक मार्गको रूपमा रहेको सो सडकको कामलाई परियोजना मार्फत नै अघि बढाउन उहाँले माग गर्नुभयो । अहिले सो सडकमा परेको बजेट सडक डिभिजन मार्फत खर्च गर्ने गरी लैजान लुछाचुँडी सुरु भएको भन्दै उहाँले विरोध जनाउनुभयो ।
गोरु काटेर खाएको फोटो र भिडियो सामाजिक सञ्जालमा हालेर सामाजिक सद्भाव र धार्मिक द्वन्द्व भड्काउने काम गरेको भन्दै उहाँले आलोचना गर्नुभयो । यसमा सरकारलाई गम्भीर हुन उहाँले आग्रह गर्नुभयो । ‘धार्मिक द्वन्द्व वा जातीय द्वन्द्व भयो भने के हुने होला ? हामी कसैले सोचेका छौँ’, उहाँले भन्नुभयो ।
सो घटनामा कतै बाहिरी तत्त्वको त सहभागिता छैन ? भन्दै उहाँले प्रश्न गर्नुभयो । घटनाको विषयमा सरकार नबोलेको भन्दै उहाँले आलोचना गर्नुभयो । घटनामा संलग्नलाई कानुन अनुसार कारबाही गर्न उहाँले माग गर्नुभयो ।
यदि नेपालमा धार्मिक द्वन्द्व भयो भने के हुन्छ भन्दै उहाँले प्रश्न गर्नुभयो । ‘नसोचेको नरसंहार यो देशमा हुन्छ’, उहाँले भन्नुभयो ।
