काठमाडौं । प्रधानमन्त्री पुष्पकमल दाहाल प्रचण्डले संघीय शिक्षा ऐन परिमार्जन गर्नुपर्ने भएकाले सदनमा पेस गर्न ढिलाइ भएको बताउनुभएकाे छ ।
मंगलबार बसेकाे प्रतिनिधि सभा बैठकमा सांसद्सँगको प्रश्नोत्तर कार्यक्रममा सांसद् उर्मिला थेबेले साेधेकाे प्रश्नकाे जवाफ दिँदै उहाँले अब चाँडै नै साे एेन सदनमा पेस गर्ने बताउनुभयाे । 'विद्यालय शिक्षा सम्बन्धी कानुनलाई संशोधन र एकीकरण गर्न बनेको विधेयक छिट्टै संसदमा पेस गरिनेछ, सायद केही दिन अघि नै पेस हुन सक्थ्याे, जनताकाे चाँसाे र त्यसलाई गहन ढंगले अध्ययन गरेर परिमार्जन गर्नुपर्ने भएकाले केही ढिला भयो,अब छिटै सदनमा प्रस्तुत हुँदैछ'- उहाँले भन्नुभयाे ।
संविधानमा उल्लेख भएबमाेजिम आधारभूत शिक्षा अनिवार्य तथा निशुल्क र माध्यमिक तहसम्मको शिक्षा नि:शुल्क उपलब्ध बनाउनका लागि सरकारले नि:शुल्क पाठ्यपुस्तक, विभिन्न प्रकारका छात्रावृत्ति, स्यानिटरी प्याड र दिवाभाेज लगायतकाे व्यवस्था गरेकाे प्रधानमन्त्री प्रचण्डले बताउनुभयाे । सार्वजनिक विद्यालयमा कुनै शुल्क लिन नपाउने र चिकित्सा शिक्षामा सरकारी लगानीका संस्थामा कुल सिटकाे ७५ प्रतिशत सिटमा विद्यार्थीले अध्ययन गरिरहेका उहाँले बताउनुभयाे ।
सार्वजनिक शिक्षालाई निशुल्क बनाइ सबैकाे पहुँचमा पुर्याउनका लागि थप स्राेतकाे व्यवस्था गर्न सरकार प्रयत्नशिल रहेकाे पनि प्रधानमन्त्री प्रचण्डले बताउनुभयाे ।
त्रिभुवन विश्वविद्यालयमा भएको विद्युतीय हाजिरी मेसिन तोडफोड विषयमा त्रिविकाे आन्तरिक प्रशासनले नियमन गरिरहेकाे भन्दै उहाँले नियमबमाेजिम नभए त्यसमा संलग्नहरुलाई कारबाही गरिने पनि बताउनुभयाे ।
ताप्लेजुङ लगायत देशभरबाट बाढी पहिराेबाट विस्थापित जनतालाई उद्धार गरी सुरक्षित ठाउँमा राखिएकाे राहतकाे व्यवस्था गरिएकाे भन्दै प्रधानमन्त्री प्रचण्डले माैसम अनुकूल भएपछि उनीहरुलाई पुर्नस्थापना गरिने बताउनुभयाे ।
