काठमाडाैं । प्रधानमन्त्री पुष्पकमल दाहाल प्रचण्डले कुर्सी टिकाउनका लागि भ्रष्टाचारकाे फाइल नखाेलिएकाे दाबी गर्नुभएकाे छ ।
मंगलबार बसेकाे प्रतिनिधि सभा बैठकमा सांसद्सँगको प्रश्नोत्तर कार्यक्रममा सांसद् असिम शाहले साेधेकाे प्रश्नकाे जवाफ दिँदै उहाँले भ्रष्टाचारमा संलग्न कसैलाई पनि नछाड्ने नीतिअनुसार सरकारले काम गरिरहेकाे दाबी गर्नुभयाे ।
भुटानी शरणार्थी लगायत प्रकरणमा राज्यले निष्पक्ष छानबिन अगाडि बढाएकै कारण जनतामा सुशासनकाे आशा पलाएकाे उहाँले बताउनुभयाे । 'सरकारका यी काम कुनै कुर्सी टिकाउनका लागि होइन, बरु देश र जनतामा राजनीतिक प्रणाली प्रति नै वितृष्णा छाएको, केही हुन्न, सबै उस्तै हुन् भन्ने निराशावादी भाष्य निर्माण गर्न खोजिएको परिस्थितिलाई चिर्न र सरकारले एकपछि अर्को राम्रो काम गर्दै आएको कुरा स्थापित गर्न पनि गरिएको छ, भुटानी शरणार्थी प्रकरणलगायतका सबै घटनामा राज्यले दबाबरहित ढंगले निष्पक्ष छानबिन अघि बढाएकै कारण अहिले जनतामा सुशासन सम्भव छ भन्ने एउटा नयाँ आशा पलाएको हो'- प्रधानमन्त्री प्रचण्डकाे दाबी छ ।
सरकार भ्रष्टाचारविरुद्ध शून्य सहनशीलताको नीति लिएर अघि बढेको भन्दै उहाँले कसैलाई बचाउने र कसैलाई फसाउने नीति नलिएकाे दाबी गर्नुभयाे । 'भ्रष्टाचारलाई कडाइसाथ नियन्त्रण गर्न सरकारले नीतिगत, कानुनी तथा संस्थागत सुधारलाई अगाडि बढाएको छ, माननीय सदस्यले भनेजस्ताे कसैलाई पनि बचाउने र अफ्ठ्यारो पार्ने नियतले कुनै पनि काम गरिएको छैन, मैले दाेषी काेहीपनि नछुटाेस् निर्दाेष काेही पनि नपराेस् भन्ने सिद्धान्त अनुसार प्रहरी प्रशासनलाई निर्देशन दिएकाे छु, यदि अनुसन्धानकाे क्रममा प्रधानमन्त्री नै आउँछ भनेपनि छाेड्न आवश्यक छैन, मेराे पार्टीको नेताको त के कुरा भनेर भन्दै आएकाे छु'- प्रधानमन्त्री प्रचण्डले दाबी गर्नुभयाे ।
सबै किसिमका भ्रष्टाचारलाई तथ्य र प्रमाणका आधारमा दोषीलाई छानबिन गर्न सरकार प्रतिबद्ध रहेकाे उहाँले बताउनुभयाे । 'सबै किसिमका भ्रष्टाचारलाई तथ्य र प्रमाणका आधारमा अनुसन्धान र छानबिन गरी दोषीलाई कारबाहीको दायरामा ल्याउनका लागि सरकार प्रतिबद्ध छ, भ्रष्टाचारको मामिलामा यो आफ्नो, यो पराइ भनेर सरकारले कसैलाई विभेद गरेको छैन र गर्ने पनि छैन, कानुनी समानताको सिद्धान्तलाई सरकारले पूर्णतः आत्मसाथ गरेको छ र गरिरहनेछ'- प्रधानमन्त्री प्रचण्डले भन्नुभयाे । ।
देश र जनतासामु कैयाैं चुनाैती रहेका भन्दै उहाँले तीनकाे समाधानका लागि सबै दलबीच साझा धारणा र राष्ट्रिय एकता जरुरी रहेकाे बताउनुभयाे । विचार, मान्यता र सिद्धान्तमा अन्तर भएपनि राष्ट्रिय मुद्दा र सबालमा सबै राजनीतिक दलहरूकाे समान दृष्टिकाेण र मान्यता हुनुपर्ने तथा राष्ट्रिय मुद्दामा सबै एकै ठाउँमा उभिनुपर्ने बताउनुभयाे । त्यसाे भए मात्र जनताले खाेजेकाे परिवर्तन ल्याउन सकिने बताउनुभयाे ।
सरकारले चालेका कदम र अघि बढाएका कामले जनतामा आशा र भराेसा बढ्नुका साथै विकासप्रतिकाे नयाँ तत्परता पैदा गरेकाे उहाँले दाबी गर्नुभयाे । यस अवधिमा सार्वजनिक सेवा प्रवाहमा जनताले साविकमा भाेग्दै आएका झण्झट र सास्तीलाई उल्लेख्य मात्रामा कमी ल्याउन सफलता मिलेकाे दाबी गर्नुभयाे । देशमा विकास निर्माणले गति लिएकाे र जनतामा नयाँ सञ्चार आएकाे दाबी पनि प्रचण्डले गर्नुभयाे ।
