काठमाडौं । प्रतिनिधि सभा सदस्य प्रदीप पौडेलले कानुन बनाउँदै कुनै व्यक्ति वा दलको स्वार्थ जोडिन नहुने बताउनुभएको छ ।
मंगलबार प्रतिनिधि सभा बैठकमा केही नेपाल ऐनलाई संशोधन गर्न बनेको विधेयक २०८० माथिको सैद्धान्तिक छलफलमा भाग लिँदै पौडेलले सबै मन्त्रालयबाट सङ्कलन गरेर एकै पटक कानुन संशोधनका लागि प्रस्तुत गर्दा व्यक्ति वा दलका स्वार्थ जोडिएको देखिएको बताउनुभयो । ‘कानु निर्माण राष्ट्रिय आवश्यकताको सिद्धान्तसँग जोडिएको हुन्छ, व्यक्ति वा दलको स्वार्थसँग जोडिएको स्थिति बन्यो भने त्यसलाई स्वाभाविक ढङ्गले लिन सकिँदैन’, उहाँले भन्नुभयो ।
अहिले ल्याइएको संशोधन विधेयकको मुलुकी फाैज्दारी कार्यविधि संहिताले हिंसात्मक गतिविधिलाई प्रश्रय दिएको उहाँले बताउनुभयो । सो कार्य नेपालको व्यवस्था विरुद्ध भएको उहाँले बताउनुभयो । त्यसले हिंसात्मक राजनीतिलाई संस्थागत गर्न खोजिएको उहाँले टिप्पणी गर्नुभयो । पौडेलले धेरै मान्छे मारेपछि राजनीतिको मूल प्रवाह आउँछु भनेपछि क्षमा दिने कुरा संसारमा कतै नभएको उहाँले प्रष्ट पार्नुभयो ।
यस्तो कानुन राजनीतिक सहमतिको आधारमा ल्याउने भनिएको बताउँदै पौडेलले सबै राजनीतिक दलका नेताहरू मिले पनि सांसदहरू सो कुरामा सहमत नहुने उहाँले प्रष्ट पार्नुभयो । ‘दलका सबै नेता मिले पनि हामी त्यो कुरा मान्नेवाला छैनौँ’, पौडेलले भन्नुभयो ।
उहाँले संशोधन गर्न ल्याइएका विधेयक खण्ड खण्ड छुटाएर ल्याउने पर्ने बताउनुभयो । त्यसो भयो भने छलफल गर्न सजिलो हुने उहाँले प्रष्ट पार्नुभयो ।
