काठमाडाैं । सर्वोच्च अदालतका प्रस्तावित न्यायाधीश विनोद शर्माको संसदीय सुनुवाइ प्रक्रिया सुरु भएकाे छ ।
शुक्रबार सिंहदरबारमा बसेकाे संसदीय सुनुवाइ समितिकाे बैठकले सर्वोच्चका प्रस्तावित न्यायाधीश शर्माको सुनुवाइ पक्रिया सुरु गर्ने निर्णय गरेकाे छ । समितिले शर्माकाे सुनुवाइका लागि उजुरी आह्वान समेत गरेकाे छ ।
समितिका ज्येष्ठ सदस्य सभापति पशुपतिसमशेर राणाले सूचना प्रकाशित भएको मितिले १० दिनभित्र स्पष्ट आधार तोकी मर्यादित भाषामा सूचना वा उजुरी दिन सरकारी सञ्चारमाध्याममार्फत सूचना प्रकाशित गर्न समिति सचिवलाई निर्देशन दिनुभयाे ।
१० दिनभित्र दिएको उजुरीमाथि समितिले छानबिन गरेपछि प्रस्तावित न्यायाधीश शर्मामाथि संसदीय सुनुवाइ हुनेछ । संसदीय सुनुवाइ समितिले उहाँको नाम अनुमोदन गरेपछि राष्ट्रपति रामचन्द्र पाैडेलले उहाँलाई सर्वाेच्चकाे न्यायाधीशमा नियुक्त गर्नुहुनेछ ।
उच्च अदालत पाटनका न्यायाधीश शर्मा हाल सर्वोच्च अदालतमा काजमा हुनुहुन्थ्याे । गत भदौ १० गते बसेको न्याय परिषद् बैठकले उनलाई सर्वोच्च अदालतको न्यायाधीश पदमा सिफारिस गर्ने निर्णय गरेको थियो ।
