काठमाडौं । प्रतिनिधि सभा सदस्य अर्जुन नरसिंह केसीले अहिले देशमा सामाजिक सद्भाव र अन्तरजातीय भाइचाराको सम्बन्ध बिग्रँदै गएको बताउनुभएको छ ।
सोमबार प्रतिनिधि सभा बैठकको विशेष सयमा बोल्दै अहिले देश धार्मिक, तथा सामाजिक विखण्डनको बाटोमा अघि बढेको उहाँले बताउनुभयो । यसले देशलाई गम्भीर संकटमा पार्ने केसीको भनाई छ । अहिले समाज छिन्न भिन्नको अवस्थामा पुगेको उहाँले बताउनुभयो । ‘सरकार के हेरेर बसेको छ ?’ उहाँले प्रश्न गर्नुभयो ।
यस्ता गतिविधि हुँदा पनि सरकार मौन बसेको भन्दै केसीले आलोचना गर्नुभयो । संगठित र असंगठित रूपमा देश र समाज माथि आक्रमण हुँदा सरकार मौन बसेको उहाँले बताउनुभयो । ‘सरकार जुन ढङ्गले मौन बसेको छ त्यो दुर्भाग्यको कुरा हो, यतातिर सम्पूर्ण राष्ट्रको गम्भीर ध्यानाकर्षण हुनुपर्छ’, उहाँले भन्नुभयो ।
भ्रष्टाचार विरुद्धका फाइल कुनै पनि टुङ्गोमा नपुगी बिचमा नै तुहिएका भन्दै उहाँले सरकारको आलोचना गर्नुभयो । अनुसन्धामा खटिएका प्रहरी धमाधम सरुवा गरिनु शंकास्पद भएको उहाँले बताउनुभयो । ‘पाँच महिना र सात महिना नपुग्दै अहिले प्रहरी अधिकारी जुन ढङ्गले परिवर्तन भएका छन्, त्यो परिवर्तन किन र कसका लागि’, उहाँले भन्नुभयो ।
प्रहरीको सरुवाले अनुसन्धानको काम प्रभावित भएको र सरकार भ्रष्टाचार नियन्त्रणमा लागेको छ भन्ने कुरामा शंका पैदा गरेको उहाँले बताउनुभयो । सुन तस्करी प्रकरणमा बनेको छानबिन आयोगको प्रतिवेदन प्रतिनिधि सभामा बुझाउनु पर्ने माग पनि उहाँले गर्नुभयो ।
