काठमाडाैं । स्वतन्त्र सांसद् अमरेशकुमार सिंहले सरकारले लाेकतन्त्रमाथि प्रहार गरिरहेकाे बताउनुभएकाे छ ।
साेमबार बसेकाे प्रतिनिधि सभा बैठकमा बाेल्दै सांसद् सिंहले सरकारले देशमा नाजीवाद र फासीवादकाे अभ्यास गर्न खाेजेकाे भन्दै आपत्ति जनाउनुभयाे । हिटलर र मुसोलिनीले जस्ताे सत्ता र सडक दुवै कब्जा गर्ने खेलमा सरकार लागेकाे उहाँले बताउनुभयाे ।
आरजु राणा र काठमाडाैं महानगरपालिकाका मेयर बालेन शाहतर्फ लक्षित गर्दै उहाँले एउटा भाउजुलाई केही भए सरकार ढल्ने र अर्कीलाई केही भए सिंहदरबार जल्ने भन्दै कटाक्ष गर्नुभयाे ।
भारतमा प्रेमिकाका लागि ताजमहल बनेकाे, नेपालमा प्रताप मल्लले रानीलाई खुशी पार्न रानीपाेखरी, खड्ग शमशेरले रानीलाई खुशी पार्न रानीमहल, सीताकाे लागि लंका जलाउने, प्रथम र दाेस्राे युद्ध भन्दा पनि ठूलाे महाभारत युद्ध भएकाे भन्दै सांसद् सिंहले त्यस्ताे कटाक्ष गर्नुभयाे । 'एउटा कार्यकारीले भन्छ वर्षात सकिनासाथ लाखाैं जनता सडकमा उतार्छु, अर्काे कार्यकारी भन्छ सिंहदरबार जलाउँछु, एउटा भाउजुलाई केही भयाे भने सरकार गिर्छ, केही हुनुहुँदैन, अर्काे भाउजुलाई केही भयाे भने सिंहदरबार जल्छ, याे कस्ताे हामी अभ्यास गर्दैछाैं ? हामी नाजीवाद र फासीवाद युगमा गइरहेका छाैं' - सांसद् सिंहले भन्नुभयाे ।
फासीवादमा हिटलर र मुसोलिनीले सत्ता पनि सडक पनि कब्जा गर्ने, जनतालाई कहीँ चल्न नदिने, लाेकतन्त्रलाई हिल्न नदिने, मानवअधिकारकाे रक्षा नगर्ने र देशकाे स्वतन्त्रता समाप्त गरेका भन्दै उहाँले कतै हामी पनि त्यता जाँदै त छैनाैं भन्ने प्रश्न गर्नुभयाे ।
भारतले नेपालकाे भूमि समेटेर नक्सा बनाउँदा र चीनले चुच्चे नक्सालाई बेवास्ता गर्दा सरकार माैन बसेकाे भन्दै सांसद् सिंहले देशकाे स्वाभिमान र भूमिबारे बाेल्न नसक्ने सरकार देशलाई नचाहिने बताउनुभयाे ।
जन्ती गएजसरी जब्बाे टाेली लिएर प्रधानमन्त्री पुष्पकमल दाहाल प्रचण्डले भारत भ्रमण गर्नुभएकाे र साे भ्रमणकाे उपलब्धि केही नभएकाे उहाँले बताउनुभयाे । त्यस्तै ५० जना बढी जब्बाे टाेली लिएर प्रधानमन्त्री प्रचण्ड राष्ट्र संघकाे महासभामा जान लागेकाे भन्दै सांसद् सिंहले जनताले सिटामाेल नपाउने, उपचार नपाउने, किसानले मल नपाउने अवस्थामा सरकार भने कराेडाैं खर्च गरेर आफ्ना नातापाता र झाेलेलाई भ्रमणमा लैजान मस्त रहेकाे बताउनुभयाे ।
