काठमाडौं । प्रतिनिधि सभा सदस्य महेशकुमार बर्तौलाले नेपाली कांग्रेसका सहमहामन्त्री महेन्द्र यादव माथि बुधबार भएको आक्रमणको घटनाको निन्दा गर्नुभएको छ ।
बिहीबार प्रतिनिधि सभा बैठकमा बोल्दै बर्तौलाले त्यसको सरकारले जिम्मा लिनु पर्ने बताउनुभयो । ‘यो घटनामा प्रधानमन्त्रीले जिम्मा लिनु पर्छ, जवाफ दिनुपर्छ’, उहाँले भन्नुभयो ।
काठमाडौंको मध्य भागमा नै असुरक्षित हुने घटना गम्भीर भएको उहाँले बताउनुभयो । यो श्रृङ्खला प्रतिपक्ष माथि विगत देखिनै भएको बताउँदै बर्तौलाले अहिले सत्ता पक्षका नेता माथि पनि सुरु भएको औँल्याउनुभयो ।
प्रमुख प्रतिपक्ष दलका नेता आफ्नो निर्वाचन क्षेत्रमा जाँदा आक्रमण भएको प्रति सरकारले ध्यान नदिँदा आज यो अवस्था सिर्जना भएको उहाँले बताउनुभयो । अहिले पनि त्यस्ता अपराधमा संलग्न मानिसलाई प्रोत्साहन दिने खालका अभिव्यक्ति आइरहेका भन्दै बर्तौलाले आपत्ति जनाउनुभयो । ‘हिजो प्रतिपक्षलाई थियो, ध्यान कम दिइयो होला, आज सत्ता पक्षका नेताहरू खोजी खोजी आक्रमण हुने स्थिति बन्यो’, उहाँले भन्नुभयो ।
नेपाली कांग्रेसका नेता यादवलाई बुधबार रिपोटर्स क्लबको कार्यक्रममा भाग लिएर निस्कने क्रममा खुकुरी प्रहार गरिएको थियो । सो प्रहारबाट गम्भीर घाइते यादवको उपचार भइरहेको छ ।
काठमाडौंको कान्ति बाल अस्पतालको चरम लापरबाही र गैरजिम्मेवारीपनका कारण एक पाँच वर्षी बालिकाले उपचार नपाएर ज्यान गएको घटना प्रति पनि उहाँले सरकारको ध्यानाकर्षण गराउनुभयो । बिरामी बालिकालाई अस्पताल पुर्याएको दुई घण्टासम्म अस्पतालले भर्ना नलिएको कारण बालिकाको ज्यान गएको उहाँले बताउनुभयो ।
बिरामी बालिकाका परिवारले बारम्बार उपचारको लागि आईसीयूमा जान दिन आग्रह गर्दा पनि अस्पतालले भित्र जान नदिएको अवस्थामा ढोका ठेलेर भित्र पुगेको केही मिनेटमा नै बालिकाको ज्यान गएको उहाँले बताउनुभयो । सो घटनाको जिम्मा अस्पताल प्रशासन, निर्देशक, र स्वास्थ्य मन्त्रीले लिनु पर्ने उहाँको भनाइ छ । घटनाका दोषी माथि कारबाही र पीडित परिवारलाई राहत प्रदान गर्न उहाँले माग गर्नुभयो ।
