काठमाडौं । राष्ट्रिय प्रजातन्त्र पार्टी (राप्रपा) का सांसद् धवलशम्शेर राणाले नेपाली कांग्रेस सहमहामन्त्री महेन्द्र यादवमाथि आक्रमण गर्ने पार्टीकाे सदस्य नरहेको बताउनुभएकाे छ ।
बिहीबार बसेकाे प्रतिनिधि सभा बैठककाे आकस्मिक समयमा बोल्दै सांसद् राणाले कांग्रेस सहमहामन्त्री यादवमाथि आक्रमण गर्ने व्यक्ति राप्रपासँग संलग्न नभएकाे बताउनुभयाे ।
यादवलाई आक्रमण गर्ने श्यामबहादुर सापकोटालाई कारबाही गर्न समेत उहाँले सरकारसँग माग गर्नुभयाे । घटनामा संलग्न भनिएका व्यक्तिले राजसंस्था, एमसीसी लगायत विषयमा नारा लगाएकै कारण राप्रपासँग जाेडेर आक्षेप लगाइएकाेमा आपत्ति जनाउँदै सांसद् राणाले राप्रपा हिंसाको राजनीतिमा कहिल्यै पनि विश्वास नगर्ने बताउनुभयाे ।
'महेन्द्र यादवजी निस्किन लाग्दा एउटा व्यक्तिले खुकुरी प्रहार गर्याे, मेरै आँखा अगाडि, उहाँ घाइते हुनुभयो, त्यो व्यक्तिलाई प्रहरीले समात्यो, त्यसपछि त्याे व्यक्तिले केही नाराहरू लगाउनुभयो, तर यो विषयलाई लिएर राप्रपालाई अलिकति आक्षेप लगाउने कुराहरू भए, ती व्यक्तिले राजसंस्था, एमसीसी लगायत विषयमा नारा लगाइरहनु भएको थियो । महेन्द्रजीले बोल्दा पनि विरोध जनाइरहनु भएको थियो, राष्ट्रिय प्रजातन्त्र पार्टी हिंसाको राजनीतिमा कहिल्यै पनि विश्वास गर्दैन, त्यो व्यक्ति हाम्रो पार्टीसँग कुनै पनि हिसाबले संलग्न थिएन, उसमाथि हुनुपर्ने कारबाही हुनुपर्छ'- उहाँले भन्नुभयाे ।
