काठमाडाैं । नेपाली कांग्रेस संसदीय दलका प्रमुख सचेतक रमेश लेखकले कांग्रेस, नेकपा एमाले र माओवादी जस्ता पुराना पार्टी खराब हुन् भन्ने कृत्रिम भाष्य निर्माण गर्न खोजिएको बताउनुभएकाे छ ।
बिहीबार बसेकाे प्रतिनिधि सभा बैठककाे विशेष समयमा बाेल्दै उहाँले नेपाली जनता संघीय लाेकतान्त्रिक गणतन्त्रात्मक व्यवस्थासँग सहमत नरहेको भन्दै कांग्रेस, एमाले र माओवादी लगायत पुराना पार्टी खराब हुन् भन्ने कृत्रिम भाष्य निर्माण गर्न खोजिएको बताउनुभयाे ।
खुकुरी प्रहार गरेर कांग्रेस, एमाले र माओवादी लगायत संघीय लाेकतान्त्रिक गणतन्त्रात्मक पक्षधर दलहरु पुराना हुन्, खराब छन्, यिनीहरुले याे मुलुकलाई निकास दिन सक्दैनन् भन्ने कृत्रिम भाष्य निर्माण गरेर लाेकतन्त्र समाप्त कसैको चाहना भए त्यो दिवास्वप्न मात्र हुने चेतावनी समेत उहाँले दिनुभयाे ।
'आज याे देशमा कृत्रिम रुपले, तथाकथित रुपले एउटा भाष्य तयार गर्ने प्रत्यत्न भएकाे छ, त्याे भाष्य भनेकाे नेपाली जनता संघीय लाेकतान्त्रिक गणतन्त्रात्मक व्यवस्थासँग सहमत छैन भनिएकाे छ, याे व्यवस्था ल्याउनका लागि याे देशमा सबैभन्दा ठूला क्रान्ति र राजनीतिक अभियान सञ्चालन गर्ने कांग्रेस, नेकपा एमाले र माओवादी लगायत संघीय लाेकतान्त्रिक गणतन्त्रात्मक पक्षधर पार्टीहरु, पुराना पार्टी, खत्तम हुन्, खराब हुन्, केही पनि हाेइनन् भन्ने कृत्रिम भाष्य तयार गर्ने प्रत्यत्न भइराखेकाे छ'- प्रमुख सचेतक लेखकले भन्नुभयाे ।
अहिलेको व्यवस्थाविरुद्ध आक्रमण गर्ने पूर्व तयारीको रूपमा निर्माण गर्न खोजिएको भाष्यका कारण संघीय लोकतान्त्रिक व्यवस्थाबाट विचलित हुने र भाग्ने अवस्था नरहेकाे उहाँले प्रष्ट पार्नुभयाे - 'याे भावना याे भाष्य नेपाली जनताकाे हाेइन याे कृत्रिम याे व्यवस्थाका विरुद्ध आक्रमण गर्ने एउटा पूर्व तयारीका रुपमा, नियाेजित रुपले, केही मानिसहरुले याे भाष्य तयार गर्दैछन्, यस्ता खालका भाष्य तयार गरेर हामी संघीय लाेकतान्त्रिक गणतन्त्रात्मक व्यवस्थाबाट विचलित हुने, भाग्ने कुनै कारण, अवस्था छैन, किनभने याे नेपाली जनताले त्याग तपस्या र बलिदानबाट ल्याएकाे व्यवस्था हाे'- प्रमुख सचेतक लेखकले भन्नुभयाे ।
लाेकतन्त्रमा कमी कमजाेरी हुन सक्ने भएपनि लाेकतन्त्र भनेकाे संसारकै उत्कृष्ट व्यवस्था भएकाे उहाँले बताउनुभयाे । आफ्ना विचार शान्तिपूर्ण रुपमा राख्न सकिने भएपनि हत्या, हिंसा र आतंक विकल्प हुनै नसक्ने प्रमुख सचेतक लेखकले बताउनुभयाे ।
देश अहिले संघीय लाेकतान्त्रिक गणतान्त्रिक व्यवस्थामा रहेकाे भन्दै उहाँले याे व्यवस्थालाई बहुदलमा आधारित बहुदलीय प्रतिष्पर्धासहितकाे संघीय लाेकतान्त्रिक गणतन्त्र र संसदीय पद्धतिमा अवलम्बन, विकास र गरिराखेकाे स्मरण गराउनुभयाे । नेपाली जनताले ७० वर्ष भन्दा पनि लामाे त्याग, तपस्या, ठूलाे आन्दाेलन र क्रान्तिहरुकाे इतिहास निर्माण गरेर याे देशमा याे व्यवस्थालाई पुराएका प्रमुख सचेतक लेखकले बताउनुभयाे । आज पनि नेपाली जनता लाेकतन्त्र, बहुलवादसहितकाे बहुदलीय व्यवस्था, संघीयता र गणतन्त्रकाे पक्षमा रहेका भन्दै उहाँले यसकाे मापन चुनावबाट गरिने र त्याे ९ महिनाअघि सम्पन्न भइसकेकाे स्मरण गराउनुभयाे ।
स्थानीय तह चुनावमा केही अपवाद बाहेक अत्यधिक बहुसंख्यामा संघीय लाेकतान्त्रिक गणतान्त्रात्मक पक्षधर पार्टीहरुले जितेका र त्याे जनताकाे अभिमत भएकाे समेत प्रमुख सचेतक लेखकले बताउनुभयाे । नेपाली जनताकाे ९ महिना पहिला अभिव्यक्त भएकाे ९५ प्रतिशत मत अहिले प्रतिनिधि सभा रहेकाे उहाँले बताउनुभयाे ।
उहाँले पार्टीका सहमहामन्त्री महेन्द्र यादवमाथि भएको आक्रमणको घटनाका सम्बन्धमा गृहमन्त्री नारायणकाजी श्रेष्ठले आजै बस्ने सदनकाे अर्काे बैठकमा जवाफ दिनुपर्ने बताउनुभयाे ।
खुकुरी प्रहार गरेर कांग्रेस सकिन्छ भन्ने भ्रम त्याग्न समेत प्रमुख सचेतक लेखकले चेतावनी दिनुभयाे । कांग्रेस लोकतन्त्रको पक्षमा अविचलित पर्वत रहेको उल्लेख गर्दै खुकुरी प्रहार गरेर कांग्रेस मर्छ भन्ने भ्रम त्याग्न आग्रह गर्दै उहाँले भन्नुभयाे - 'खुकुरी प्रहार गरेर कांग्रेस मर्छ भन्ने भ्रममा काेही हुनुहुन्छ भने त्याे भ्रम निकालिदिए हुन्छ, खुकुरी प्रहार गरेर कांग्रेस मर्दैन, कांग्रेस लोकतन्त्रको पक्षमा अविचलित ढंगले उभिएकाे पर्वत हाे, मानिसले खुकुरी प्रहार गरेर कांग्रेस सकाउँछु भन्नु र टाउकोले हिर्काएर पर्वत खसाउँछु भन्नु एउटै हो, कांग्रेस लोकतन्त्रको पक्षमा अविचलित भएर उभिँदा राणाहरूले टाउको जुधाए, पञ्चायतले टाउको जुधाए, राजाले टाउको जुधाएको छ, पहाडसँग जुध्ने टाउकाहरू फुट्छन्, पहाड फुटेको इतिहास छैन ।'
