काठमाडाैं । नेकपा एमालेका सांसद् रघुजी पन्तले आसन्न चीन भ्रमणका विषयमा प्रधानमन्त्री पुष्पकमल दाहाल प्रचण्डले सदनमा जानकारी गराउनुपर्ने बताउनुभएको छ ।
बिहीबार बसेकाे प्रतिनिधि सभा बैठककाे विशेष समयमा बाेल्दै सांसद् पन्तले चीन भ्रमणका एजेण्डाबारे प्रधानमन्त्री प्रचण्डले सदनमा जानकारी गराउनुपर्ने बताउनुभयाे ।
चीन भ्रमणको एजेण्डा र प्राथमिकताहरूबारे सदनलाई जानकारी गराएर छलफल चलाउन समेत उहाँले प्रधानमन्त्री प्रचण्डकाे ध्यानाकर्षण गराउनुभयाे । प्रधानमन्त्री र परराष्ट्रमन्त्रीले चीन भ्रमणका एजेण्डाबारे बाहिर बाहिर बाेल्दै हिँडेकाे तर सदन चलेका बेलामा साे विषय जानकारी गराउन चासाे नदिएकाेमा उहाँले आपत्ति जनाउनुभयाे ।
सदनको भावना र विश्वासलाई लिएर चीन जान सांसद् पन्तले प्रधानमन्त्रीलाई सुझाव दिनुभयो । चीन भ्रमण र संयुक्त राष्ट्र संघमध्ये सबैभन्दा बढी प्राथमिकता कुन हाे भन्नेबारे पनि प्रधानमन्त्री प्रचण्डले सदनमा जानकारी गराउनुपर्ने उहाँले बताउनुभयाे । प्रधानमन्त्री प्रचण्ड न्युयोर्क भ्रमणपछि सिधै चीन जाँदा त्यसको प्रभाव कम हुन सक्ने भएकाले गम्भीर भएर सोच्न पनि सांसद् पन्तले सुझाव दिनुभयो ।
प्रधानमन्त्रीकाे भ्रमण औपचारिक, सद्भावना वा राजकीय के भ्रमण हाे भन्नेबारे परराष्ट्रमन्त्रीले संसद्लाई जानकारी गराउनुपर्ने उहाँले बताउनुभयाे ।
नेपालकाे चुच्चे नक्सा कसरी छुट्याे भन्ने कुरा प्रधानमन्त्री प्रचण्डले चीनलाई ध्यानाकर्षण गराउनुहने विश्वास पनि सांसद् पन्तले व्यक्त गर्नुभयाे ।
प्रधानमन्त्रीकाे चीन भ्रमण सामान्य भ्रमणमा मात्र नहुने भन्दै उहाँले यसअघि भएका सहमति र सम्झाैता कार्यान्वयनबारे कुरा गर्न दिन सुझाव दिनुभयाे ।
सन् २०१६ मा केपी ओलीको भ्रमण र त्यसबेलाको सहमति नेपालको राजनीतिक इतिहासमा र नेपालको परराष्ट्र नीति सञ्चालनमा कोशेढुंगा भएको भन्दै सांसद् पन्तले प्रधानमन्त्रीको भ्रमण फलदायी हुनुपर्ने बताउनुभयाे । 'जसरी सन् २०१६ मा केपी ओलीले गर्नुभएकाे चीन भ्रमण र त्यसबेला भएकाे सहमति नेपालकाे राजनीति इतिहासमा र नेपालकाे परराष्ट्र नीति सञ्चालनकाे मामलामा माइल अफ स्टाेन भएकाे छ, त्याे काेसेढुंगा अहिलेकाे प्रधानमन्त्रीकाे पनि हुन सकाेस्, किनभन्दा त्यसबेला भएका धेरै कुरा कागजमा सीमित भएर बसेका छन्, ती सम्झाैतालाई व्यवहारिक रुपमा कार्यान्वयन गर्ने दायित्व अहिलेकाे सरकारकाे पनि हाे, त्यसैले ती विषयमा सिंगाे संसद् र देशकाे विश्वास लिन सक्नुस्'- उहाँले भन्नुभयाे ।
सांसद पन्तले प्राथमिकताका आधारमा सडक र नाका निर्माण तथा सञ्चालन गर्नका लागि प्रधानमन्त्रीले चीनसँग कुरा गर्नुपर्ने बताउनुभयो । केपी ओलीकाे पालामा भएकाे पारवहन सम्झाैताका कारण नेपाललाई धेरै सहज भएकाे भन्दै उहाँले त्यसका बाँकी पक्ष पनि कार्यान्वयन गर्न समेत सुझाव दिनुभयाे ।
पाेखरा र भैरहवा विमानस्थल सञ्चालनका लागि चीनबाट चाइनिज एयरलाइन्सकाे फ्लाइट ओपन हुन सक्ने भए यसबारे पनि प्रधानमन्त्रीकाे भ्रमणमा कुरा उठाउनुपर्ने, बीआरआईकाे कार्यान्वयन तथा चिनियाँ पुँजी र प्रविधि नेपालमा ल्याउन पनि प्रधानमन्त्रीकाे भ्रमण फलदायी हुनुपर्ने सांसद् पन्तले बताउनुभयाे ।
