काठमाडौं। प्रतिनिधि सभा सदस्य रघुजी पन्तले हत्या हिंसा लोकतन्त्रमा वाञ्छनीय कार्य नभएको बताउनुभएको छ ।
बिहीबार प्रतिनिधि सभा बैठकमा बोल्दै पन्तले बुधबार नेपाली कांग्रेसका सहमहामन्त्री माथि भएको आक्रमण लोकतन्त्र विरुद्धको आपराधिक कार्य भएको बताउनुभयो । सो कार्य निन्दनीय भएको उहाँले बताउनुभयो ।
फरक प्रसङ्गमा पन्तले प्रधानमन्त्रीको चीन भ्रमणका एजेण्डाको विषयमा संसद्मा छलफल नभएको प्रति आपत्ति जनाउनुभयो । ‘प्रधानमन्त्री सार्वजनिक रूपमा भाषण गर्दै हुनुहुन्छ, परराष्ट्र मन्त्री सार्वजनिक रूपमा भाषण गर्दै हिँड्नुहुन्छ आगामी चीन भ्रमणका एजेण्डाका बारेमा, तर संसद्लाई केही पनि थाहा छैन’, उहाँले भन्नुभयो ।
प्रधानमन्त्रीको चीन भ्रमणका एजेण्डाका विषमा संसदमा छलफल हुन पर्ने उहाँले माग गर्नुभयो । उहाँले प्रधानमन्त्रीको चीन भ्रमणको प्राथमिकताको विषयमा समेत प्रश्न उठाउनुभयो । न्यूयोर्कको संयुक्त राष्ट्रसंघ प्रधानमन्त्रीको प्राथमिकता हो कि चीन भ्रमण प्राथमिकता हो भन्ने कुरा प्रधानमन्त्रीले प्रष्ट पार्नुपर्ने उहाँले बताउनुभयो ।
पन्तले प्रधानमन्त्री चीन भ्रमण, औपचारिक, सद्भावना वा राजकीय भ्रमण के हो प्रष्ट पार्नुपर्ने बताउनुभयो । परराष्ट्र मन्त्रालयले यस विषयमा प्रष्ट पार्नुपर्ने उहाँको माग छ । भ्रमणको बेलामा नेपालको चुच्चे नक्साको विषयमा प्रधानमन्त्रीले ध्यानाकर्षण गराउनु पर्ने उहाँले बताउनुभयो ।
केपी ओलीले चीन भ्रमणको बेलमा गरेका सहमति कार्यान्वयन गर्ने कुरामा अहिलेको भ्रमण केन्द्रित हुनु पर्ने उहाँले बताउनुभयो । नेपाललाई तत्काल लाभ हुने हिसाबले प्रधानमन्त्रीले भ्रमणको बेलामा पहल गर्नुपर्नेमा उहाँले जोड दिनुभयो । नेपालको उत्तरका सबै नाका खुलाउने कुरामा प्रधानमन्त्रीको ध्यान जानु पर्ने उहाँले बताउनुभयो ।
