काठमाडाैं । नेकपा एमालेका सांसद् योगेश भट्टराईले अनधिकृत रुपले ५० देखि ४ सय ५० केजीसम्मका एलपी ग्यास बिक्रिबितरण भइरहेको भन्दै सम्बन्धित निकायको ध्यानाकर्षण गराउनुभएको छ ।
आइतबार सिंहदरबारमा बसेको प्रतिनिधि सभाकाे सार्वजनिक लेखा समिति बैठकमा सांसद् भट्टराईले सम्बन्धित मन्त्रालय र आयल निगमसँग अनुमति नलिई केही कम्पनीले बढी तौलका खाना पकाउने ग्यास बिक्रिबितरण गरिरहेको बताउनुभयाे । यसले जोखिम उत्पन्न हुने भन्दै उहाँले सम्बन्धित निकायको गम्भीर ध्यानाकर्षण गराउनुभयाे ।
खाना पकाउने ग्यास १४ दशमलव २ किलो हुनुपर्ने मापदण्ड रहेकोमा बढी तौलको ग्यास बिक्री बितरणको विषयमा सरोकारवाला निकायसँग समितिले छलफल गर्नुपर्ने उहाँले बताउनुभयाे ।
बढी तौलका ग्यास सिलिण्डरमा गुणस्तर चिन्ह नभएको र १४ दशमलव २ किलोको सिलिण्डरको थिकनेस र ५० देखि ४५० केजीसम्मका ग्यास सिलिण्डरको थिकनेस एउटै रहेको भन्दै सांसद् भट्टराईले यसले ठूलो दुर्घटना निम्ताउन सक्ने बताउनुभयाे । उहाँले ग्यासका कारण हुने दुर्घटनाको क्षतिपूर्ति पनि प्रभावकारी हुन नसकेको बताउनुभयाे ।
महालेखाले औंल्याएका बेरुजुबारे सार्वजनिक लेखा समितिले अध्ययन गर्ने भएकाे छ । समितिले विभिन्न मन्त्रालय, संवैधानिक आयोग र अन्य सरकारी निकायको बेरुजु सम्परीक्षण गर्नका लागि ९ वटा उपसमिति समेत गठन गरेको छ ।
