काठमाडाैं । प्रतिनिधि सभाको सार्वजनिक लेखा समितिले महालेखापरीक्षकको वार्षिक प्रतिवेदनमा उल्लेख बेरुजुबारे अध्ययन गर्ने भएको छ ।
सिंहदरबारमा आइतबार बसेको समिति बैठकले महालेखापरीक्षकको वार्षिक प्रतिवेदनमा उल्लेख बेरुजुबारे अध्ययन गर्ने निर्णय गरेकाे हाे । समितिले विभिन्न मन्त्रालय, संवैधानिक आयोग र अन्य सरकारी निकायको बेरुजु सम्परीक्षण गर्न ९ वटा उपसमिति समेत गठन गरेकाे छ ।
महालेखाको ४४ देखि ६० औं प्रतिवेदनसम्म अध्ययन हुन नसकेकाले विभिन्न उपसमिति बनाएर अध्ययन गर्ने निर्णय भएकाे समिति सभापति ऋषिकेश पोखरेलले जानकारी दिनुभयाे । २१ वटा मन्त्रालय र २० वटा संवैधनिक आयोगको बेरुजु अध्ययन गर्न समितिले विभिन्न ९ वटा कलष्टर छुट्टाएर उपसमिति बनाएको हाे ।
सभापति पाेखरेलका अनुसार उपसमितिले महालेखापरीक्षकको वार्षिक प्रतिवेदनमा देखिएका बेरुजुको सम्परीक्षणको काम गर्नेछ । उपसमितिले गम्भीर प्रकृति, सामान्य प्रकृतिलगायतका बेरुजु छुट्टाएर थप अध्ययन गर्नेछ ।
९ उपसमितिमा गोकुलप्रसाद बाँस्कोटा, दामोदर भण्डारी, अर्जुननरसिंह केसी, राजेन्द्रकुमार केसी, रामकृष्ण यादव, लेखनाथ दाहाल, मनिष झा, राजेन्द्र लिङ्देन र प्रदीप यादवलाई संयाेजक बनाइएकाे छ ।
