काठमाडाैं । स्वास्थ्य तथा जनसंख्या मन्त्री माेहन बहादुर बस्नेतले चिकित्सकको सुरक्षाका लागि सरकार गम्भीर भएको बताउनुभएकाे छ ।
शुक्रबार सिंहदरबारमा बसेकाे प्रतिनिधि सभाकाे शिक्षा, स्वास्थ्य तथा सूचना प्रविधि समितिकाे बैठकमा बाेल्दै मन्त्री बस्नेतले चिकित्सकमाथि आक्रमण र दुर्व्यवहार गर्नेलाई कानुनी कारबाही गरेर सहज रुपमा उपचार गर्ने वातावरण बनाउन सरकार प्रतिबद्ध रहेको बताउनुभयाे ।
अहिलेकै दरबन्दी कायम रहे जस्तो व्यवस्था गरेपनि चिकित्सकहरुमाथिको दुर्व्यव्यवहारलाई सत प्रतिशत न्यूनिकरण गर्न भने नसकिने उहाँकाे भनाइ थियाे । मन्त्री बस्नेतले स्थायी रुपमा समस्या समाधानका लागि मन्त्रालयले गम्भीर भएर काम गरेको र गृह पनि त्यही अनुसार अघि बढेको बताउनुभयो ।
चिकित्सकहरुको सुरक्षाका लागि अस्पतालमा सुरक्षाकर्मी राख्नेबारे गृहमन्त्री नारायणकाजी श्रेष्ठसँग बिहीबार छलफल भएको उहाँले दाबी गर्नुभयाे । गृहमन्त्रीसँगको छलफलमा चिकित्सकहरु असुरक्षित ठानिएका अस्पतालहरूमा ६ देखि ७ जनासम्म हतियारसहित सुरक्षाकर्मी राख्ने समझदारी भएको मन्त्री बस्नेतले जानकारी दिनुभयाे ।
आन्दोलन फिर्ता लिएर सेवामा फर्किन समेत उहाँले चिकित्सकहरुलाई आग्रह गर्नुभयाे ।
