काठमाडाैं । प्रधानमन्त्री पुष्पकमल दाहाल प्रचण्डले आफ्नाे चीन भ्रमणले दुई देशबीचकाे आपसी विश्वासकाे वातावरणलाई सुदृढ गरेकाे बताउनुभएकाे छ ।
आइतबार बसेकाे प्रतिनिधि सभा बैठकमा आफ्नाे चीन र अमेरिका भ्रमणबारे जानकारी गराउँदै प्रधानमन्त्री प्रचण्डले चीन भ्रमण फलदायी भएकाे बताउनुभयाे ।
भ्रमणका दाैरान चिनियाँ राष्ट्रपति सी चिनफिङ, समकक्षी ली छ्याङ लगायतसँग भएकाे भेटले दुई देशबीचकाे सम्बन्ध अझ सुदृढ हुने विश्वास पनि उहाँले व्यक्त गर्नुभयाे । राजनीतिक तहमा विश्वासको वातावरण बनेको भन्दै प्रधानमन्त्री प्रचण्डले पूर्वाधार निर्माण, व्यापार, लगानी तथा जनस्तरको सम्बन्ध विस्तार मा दुईपक्षीय सहयोग र सहकार्यलाई तीव्रता दिन मार्गप्रशस्त गर्ने विश्वास पनि व्यक्त गर्नुभयाे ।
चीन भ्रमणले ४ वर्ष लामो नेतृत्व तहबाट एकअर्का मुलुकमा भ्रमण नभएको स्थितिको अन्त्य भएको पनि प्रधानमन्त्री प्रचण्डले बताउनुभयाे ।
